17:30 31.05.2013 | Все новости раздела "Либерально демократическая партия Узбекистана"

СПОРТ ҲАЁТИДАН ҲЕЧ КИМ ЧЕТДА ҚОЛМАСЛИГИ КЕРАК!

О‘zLiDeP Навоий шаҳар Кенгаши ташаббуси билан шаҳардаги меҳрибонлик уйида 1 июнь - Халқаро болаларни ҳимоя қилиш куни муносабати билан “Спорт ҳаётидан ҳеч ким четда қолмаслиги керак!” шиори остида спорт мусобақаси ўтказилди.

Мусобақанинг очилиш маросимида О‘zLiDeP томонидан кенг кўламда амалга оширилаётган “Соғлом оила – мустаҳкам оила” лойиҳаси, унинг мақсад ва вазифалари, партиянинг аҳоли, айниқса, хотин-қизлар саломатлигини мустаҳкамлаш борасидаги ишлари ҳақида қисқача тушунтириш берилди.

“Партия Сайловолди платформасида белгилаб қўйилганидек, ёшлар салоҳиятини ривожлантириш – бу келажакка сармоя киритиш, демакдир. Шу боис бугунги мусобақадан мақсад ҳам меҳрибонлик уйи тарбияланувчиларининг бўш вақтларини мазмунли ўтказиш, уларни спортга кенг жалб этишдир”, – деди О‘zLiDeP Навоий вилоят Кенгаши Аёлларнинг сиёсий фаоллиги, жамиятдаги ўрни ва мавқеини ошириш бўлими мудири Шалола Шокирова.

Мусобақада 14-16 ёшгача бўлган қизлар гуруҳларга бўлиниб, қувноқ стартлар кўринишида беллашди. Мусобақанинг иккинчи қисми эса арқон тортиш ва “Оқ теракми, кўк терак” каби миллий халқ ўйинлари тарзида ўтказилди. Шундан сўнг иштирокчилар “Спорт - соғлиқ гарови” мавзуида расм чизишдаги иқтидорларини синаб кўрди.

Қизиқарли ва кўтаринки руҳда ўтган мусобақа якунида иштирокчиларнинг барчасига партиянинг байрам совғалари тақдим этилди.
О‘zLiDeP Навоий вилоят КенгашиМатбуот хизмати