22:15 30.10.2012 | Все новости раздела "Либерально демократическая партия Узбекистана"
Партиявий дастурлар ёхуд Ўзбекистон Либерал-демократик партиясининг муайян мақсадларга қаратилган Ҳаракат дастурлари жойларда қандай натижа бермоқда?
Агар O’zLiDePнинг 2011-2012 йиллардаги фаолиятини таҳлил этсак, ана шу даврда партия аниқ мақсадларга қаратилган дастурлар яратиб, улар ижросини қатъий назоратга олганини кўриш мумкин. 2011 йили Сурхондарё ва Андижон вилоят кенгашларида илк Ҳаракат дастурлари қабул қилинган бўлса, 2012 йилга келиб, халқ депутатлари Бухоро, Жиззах, Наманган, Тошкент, Фарғона ва Қашқадарё вилоят кенгашларида O’zLiDePнинг навбатдаги Ҳаракат дастурлари қабул қилинди. Хўш, маҳаллий кенгашлардаги депутатлик гуруҳи томонидан тайёрланган ушбу ҳужжатлар бугунгача қандай натижалар берди? Ушбу саволга жавоб қайтариш учун халқ депутатлари Фарғона вилоят кенгашида тасдиқлаган 7 бобдан иборат Ҳаракат дастурининг битта йўналиши натижаларини кўриб чиқайлик. Унинг «Коллеж битирувчиларини тадбиркорликка жалб этиш, уларда тадбиркорлик кўникмаларини шакллантириш» номли бешинчи йўналиши 11 банддан иборат. Унда асосан O’zLiDeP Фарғона вилоят кенгашида ўрта-махсус таълим йўналишида олиб борилаётган ишлар самарадорлиги, коллежларда тадбиркорлик асослари фанининг ўқитилиши сифати, тадбиркорликка тайёрлаш учун яратилган вазият атрофлича таҳлил қилинган. Масалан, Ёзёвон туманидаги касб-ҳунар коллежларининг 12862 нафар битирувчиси O’zLiDeP туман ва шаҳар кенгаши, депутат ва бошланғич партия ташкилоти етакчиларига бириктирилган. Барча коллежларда “Тадбиркорлик — тараққиёт кўзгуси”, “Бунёдкор ёшлар — миллий юксалиш омили” мавзуида тадбирлар ташкил этилганидан кейин ёшларга кредит олиш, тадбиркорлик фаолиятига оид қонун ҳужжатлари билан атрофлича танишиш имконияти яратиб берилди. Битирувчиларнинг тадбиркорлик ҳақидаги тушунчаларини кенгайтиришда мулкдорлар тажрибасидан унумли фойдаланилганини эса алоҳида таъкидлаш жоиз. Хусусан, “Водий имкон транс” хусусий корхонаси, “Амириддин ери”, “Миндон Мирзаҳамдам”, “Нон Наврўз” фермер хўжаликлари, “Чимён форум”, “Одилхожи” МЧЖ каби ўнлаб ташкилотлар бу ташаббусни қўллаб-қувватладилар. Халқ депутатлари вилоят кенгашидаги депутатлик гуруҳи томонидан эса ўқувчилар амалиётини мониторинг қилиш йўлга қўйилди. Шундан кейин тайёргарликнинг иккинчи босқичига қадам қўйилди, яъни асосий эътибор бизнес-режа тузиш, ҳужжатларни расмийлаштириш, шунингдек, кредит портфелини шакллантириш масалаларига қаратилди. Шу ўринда кредит учун гаров таъминлаш масъулияти муайян соҳа вакилларига юклатилгани яхши самара берганини айтиш жоиз. Биринчидан, бунда ўз мулкини гаровга қўйган ишбилармон бор билим ва маҳоратини кредит қайтарилиши учун ёш тадбиркор фаолиятини йўлга қўйишга қаратади. Иккинчидан, тадбиркорликка эндигина кириб келаётган ёшлар бозор “об-ҳаво”сига ўргангунча етакчи-устоз тимсолидаги ҳимоячи ёрдамини доимо ҳис этиб турадилар. Ёш тадбиркор ўз фаолиятини йўлга қўйганидан кейин ҳам Ҳаракат дастурининг таъсири тўхтамади. Бу банкдан кредит олиш ҳамда солиққа тортишга оид босқичларда мавжуд имтиёзлардан тўлиқ фойдаланиш бўйича амалий маслаҳатлар, баъзи ҳолларда эса иқтисодий ҳамкорлик кўринишида давом этди.Масалан, Фарғона электротехника касб-ҳунар коллежи битирувчиси Темурбек Турдибоев O’zLiDeP томонидан таъсис этилган танловда қатнашишдан аввал “Fito Vivo Classik” МЧЖ раҳбари Неъмат Муҳсинов билан ҳамкорликни йўлга қўйди. Ҳаражат ва даромадлар бирга хомчўт қилинди. Бу эзгу ишга халқ депутатлари Марғилон шаҳар кенгашидаги O’zLiDeP депутатлик гуруҳи аъзоси Қаҳҳор Сиддиқов ҳам кўмак берди. Темурбек устозлари маслаҳатида шаклланган “Гипстош маҳсулотларини ишлаб чиқариш” бўйича бизнес-режаси билан “Ёш тадбиркор – юртга мададкор” танловининг Республика босқичида ғолиб бўлиб, банкдан 14 млн. сўм фоизсиз кредит олди.Энг муҳими, аввал фақат маслаҳат берганлар энди ёш тадбиркорнинг амалий ёрдамчиларига айландилар. Хусусан, Қ.Сиддиқов “Temurxon Elektro Texnik” хусусий корхонасини очиш учун керакли ҳужжатларни расмийлаштиришга кўмаклашган бўлса, Неъмат ака “Fito Vivo Classik” МЧЖдан кафолат тақдим этиб, кредит учун гаров таъминоти масаласини ҳал қилди. Темурбек Турдибоев эса 4 нафар тенгдошини ҳам ишлаб чиқаришга жалб этди. Натижада кечаги ўқувчи қурилиш ташкилотларининг бизнес ҳамкорига айланди.Бир сўз билан айтганда, коллеж битирувчисига берилган амалий ёрдам, яъни бу борада депутатлик ва жамоатчилик назоратининг изчил ўрнатилгани натижасида ёш тадбиркор ўз бизнесини йўлга қўйди. Шу ўринда Ҳаракат дастурининг 9 ойлик ижроси натижасида Фарғона вилоятида ёшларга жами 5 млрд. 184 млн. сўм кредит ажратилганини таъкидлаш жоиз. 2012 йил бошидан буён 888 нафар умидли тадбиркорлар шаклланган бўлса, уларнинг 446 нафари Темурбекка ўхшаган коллеж битирувчиларидир. Юқорида халқ депутатлари Фарғона вилоят кенгашига O’zLiDeP депутатлик гуруҳи томонидан тақдим этилган Ҳаракат дастурининг биргина йўналиши бўйича амалга оширилган битта лойиҳа натижасини кўриб чиқдик, холос. Агар мамлакатимизнинг олти вилоятида ана шундай дастурлар асосида иш олиб борилаётгани инобатга олинса, депутатлик гуруҳларининг фаолияти қандай натижа бераяпти, деган саволга жавоб олиш мумкин бўлади. Тан олиш керак, O’zLiDePнинг аниқ мақсадларга қаратилган ушбу дастурлари маҳаллий вакиллик органлари учун ҳам яхши самара бергани ушбу тажрибани янада ривожлантиришни тақозо этмоқда. Зеро, халқ депутатлари маҳаллий кенгашларига юртимиздаги тўртта партиянинг депутатлик гуруҳлари томонидан киритиладиган дастурлар соғлом рақобат асосидаги курашни шакллантиради. Чунки ҳар бир партиянинг ҳудудий Ҳаракат дастури муайян электорат манфаатига таянилган ҳолда ишлаб чиқилган. Шу йўл билан эса ҳудудларда ўз ечимини кутаётган айрим масалалар тўрт карра кўпроқ муҳокама этилиб, уларни бартараф этишнинг муқобил йўллари изланади. Натижада аниқ таклифларни ўзида мужассам этган рақобатбардош ва самарали Ҳаракат дастурлари пайдо бўлади. Энг муҳими, бу жараёнга маҳаллий кенгашлардаги партия фаоллари ҳамда БПТлар жалб этилади. Электорат фаолияти билан боғлиқ долзарб масалалар ҳам изчил ўрганиб борилади. Маҳаллий кенгашларда эса муносиб дастурлар танлаш имконияти юзага келади. Пировардида сайловларда Қонунчилик палатасига энг кўп депутатлик ўрнини қўлга киритган партиянинг мамлакатни ижтимоий-иқтисодий ривожлантириш дастури шаклланади. O’zLiDePнинг Ҳаракат дастурлари асосида амалга оширилаётган бундай ишларни маҳаллий вакиллик органларига самарали таъсир механизми сифатида эътироф этиб, 2014 йилги сайловга тайёргарлик, деб баҳолаш ҳам мумкин. Чунки партия ва унинг депутатлари фаолиятидан манфаатдор бўлган Темурбекларга ўхшаш юзлаб, минглаб ёш йигит-қизлар оила аъзолари, яқинлари, ҳамкасблари, қўни-қўшниларига ҳам мазкур партия фаолиятининг амалий самарасини етказа бошлайдилар. Охир оқибатда эса ҳудудда партия илгари сураётган ғоя ва мақсадларга ишонч янада мустаҳкамланади. Бу, ўз навбатида, партиядан кўрсатилган номзодларнинг кўп овоз олишларига йўл очиши мумкин.
Яшнар ХУДОЙБЕРГАНОВ,Миллий ғоя ва мафкура
илмий-амалий маркази тадқиқотчиси«XXI asr»
Обсудить новость на Форуме