15:00 20.03.2008 | Все новости раздела "Объединенная Гражданская Партия"

У Полацку БРСМ адсвяткуе дзень БНР без тытуню

13:43, 20 Марта |

Гарвыканкам не дазволіў правядзенне пікету 25 сакавіка ў гонар 90-годдзя БНР ля кінатэатра "Радзіма" з 17 да 19, як таго хацелі ініцыятары. Іх назвалі "шпіёнамі".

Пра гэта яны даведаліся з пісьмовага адказу, падпісанага намеснікам старшыні выканкама Мікалаем Ільюшонкам. Падставаю для адмоўнага адказу  зьяўляецца тое, што якраз у той час і ў тым месцы гарвыканкамаўскі аддзел па працы з моладдзю і БРСМ будуць разам праводзіць акцыю "Дзень без тытуню".

Арганізатары пікету паспрабавалі знайсці аўтараў такога супадзення.

– Гэтае мерапрыемства даўно ўключана ў сумесны план гарвыканкама і БРСМ і таму нам не трэба было падаваць заяўку на правядзенне акцыі, – так адказала па тэлефоне першы сакратар полацкага гаркама БРСМ  Святлана Чэркас.

– У плане мерапрыемстваў указаны толькі месяц, у якім запланавана яго правядзенне. Рашэнне аб канкрэтным дні і месцы мы прымалі разам з  БРСМ і намеснікам старшыні гарвыканкама Ільюшонкам. Мерапрыемства плануем масавае – ўдзельнікаў 150-200, вузел сувязі забяспечыць гукаўзмацненне. Пасьля мітынгу пакажам для моладзі бясплатна ў кінатэатры фільм. Тое, што гэта вечар працоўнага дня – не праблема. Так нам лягчэй забяспечыць масавасць, – шчыра прызналася загадчыца аддзелу працы з моладдзю Полацкага гарвыканкама Наталля Ганебная.

На просьбу паглядзець план мерапрыемстваў, каб пераканацца, што ён сапраўды існуе,  адмовіла.

– Я магу зрабіць гэта толькі з дазволу Мікалая Ільюшонка.

На пытанне: "Чаму такая сакрэтнасць?", яна ці то жартам ці то ўсур’ёз, адказала:

– А раптам вы шпіёны?

Полацкія ўлады ўжо не ўпершыню адмаўляюць грамадзянам у магчымасці праз пікетаванне  выказаць свае адносіны да палітычнай падзеі. Ініцыятарам забароны  ўжо ня першы раз зьяўляецца сп.Ілюшонак.

– Нашы чыноўнікі вельмі любяць бываць у нямецкім горадзе Фрыдрыхсхафене – пабраціме Полацка, і, напэўна, хлусяць там, якія яны вялікія дэмакраты. Было б добра, каб парачку такіх чыноўнікаў, напрыклад Наталлю Ганебную і Мікалая Ільюшонка, павярнулі з нямецкай амбасады за гэта бяз шэнгенскіх візаў – такі ўрок дэмакратыі быў бы вельмі дзейсным, - так лічаць ініцыятары забароненага пікету Мікола Шарах і Уладзімір Агапончык.

Дзеянні полацкіх чыноўнікаў грамадзяне будуць абскарджваць у полацкім судзе.



Источник: Объединенная Гражданская Партия

  Обсудить новость на Форуме