15:00 31.10.2007 | Все новости раздела "Объединенная Гражданская Партия"
«Сацыяльны марш». А што гэта такое?
12:15, 31 Октября | Яўгень Таўгень,
Чаму так мала людзей выходзяць на акцыi пратэсту? Пашукаць адказ на гэтае пытанне мы вырашылi каля прахадной Мiнскага аўтамабiльнага завода.
На вулiцы Працоўнай, амаль побач з прахадной, гутараць тры пажылыя жанчыны. Падыходжу, расказваю пра мэту вандроўкi сюды i адразу пытаюся:
— Вы возьмеце ўдзел у “Сацыяльным маршы”?
Жанчыны здзiўлена пераглянулiся. Потым адна пытае:
— А што гэта такое?
— Акцыя пратэсту супраць росту цэн, дарагоўлi i пагаршэння жыцця...
— Ой, жыццё сапраўды пагаршаецца. На пенсiю не пражывеш, — працягвае суразмоўца. — А наконт удзелу... Магчыма, i пайшла б, каб ведала пра яго болей.
Яе сяброўкi iншай думкi.
— Якi толк з таго маршу, — кажа другая. Трэцяя дадае: “Старыя мы ўжо шпацыраваць па вулiцы”.
З прахадной выходзяць людзi. Падыходжу да маладога хлопца. Кажа, што працуе рабочым. Пра Марш нiчога не чуў. Наконт удзелу адказвае:
— Ведаеце, мая галава забiта зусiм iншымi праблемамi.
Iду насустрач мужчыне ў гадах. Разгаварылiся. Пра акцыю ён таксама нiчога не чуў. Наконт дарагоўлi разважае фiласофскi:
— Навошта змагацца з ростам цэн? Гэта бессэнсоўна. Раслi i будуць расцi. Ва ўсiм свеце растуць. Калi ў нас застануцца нiзкiмi, я закуплю тут тавар, павязу ў Маскву, прадам у два разы даражэй i кiну потым гэты завод, а вы кiнеце работу ў сваёй газеце, будзем гандляваць таварамi.
— А як жа змагацца за паляпшэнне жыцця?
— Трэба дамагацца павышэння зарплаты.
— Вы дамагаецеся?
— За мяне начальства падумала. Праз месяц буду зарабляць на 100 тысяч больш.
— А якая зарплата цяпер?
— За мiнулы месяц атрымаў чыстымi, на рукi, 750 тысяч рублёў.
Чарговы суразмоўца, рабочы сярэдняга ўзросту, разважае так:
— Каб прымаць удзел у акцыi, трэба ведаць намеры iх арганiзатараў.
— Якiя ў iх намеры могуць быць?
— Ну, нейкiя палiтычныя цi эканамiчныя. Чаму я павiнен працаваць на iх?
Iдуць дзве жанчыны сярэдняга ўзросту. Пытаю:
— Вы працуеце на аўтазаводзе?
— Так.
— Я з газеты, можна вам задаць пытанне?
— Прабачце, мы з заводской палiклiнiкi, спяшаемся на працу.
I яны борздзенька паспяшалiся па тратуары.
Iнжынер таксама не чуў пра “Сацыяльны марш”. А наконт свайго ўдзелу ў iм так адказаў:
— Вы ж ведаеце, што ў нас шмат лянiвых людзей. Я адношуся да iх.
З цыгарэтай у зубах выходзiць з прахадной чарговы аўтазаводзец.
— Цi чулi што пра “Сацыяльны марш”? — пытаюся ў яго.
— Не-е, не чуў. I не ўдзельнiчаю ў такiх рэчах.
— Чаму?
— Разумееце, я не актывiст, я просты рабочы.
Я пагутарыў з 21-м чалавекам. Нiхто з iх нiчога не чуў пра гэты Марш. Толькi адна пенсiянерка сказала, што, магчыма, i ўзяла б у iм удзел, калi б больш ведала пра яго.
Обсудить новость на Форуме