18:30 08.10.2007 | Все новости раздела "Объединенная Гражданская Партия"

Эўрапейскі Марш: улады ўзялі яшчэ адзін дзень на роздум

17:19, 8 Октября |

Заяўнікі Эўрапейскага Маршу лідэр Партыі БНФ Вінцук Вячорка, яго намесьнік Віктар Івашкевіч, лідэр Маладога фронту Зьміцер Хведарук і каардынатар кампаніі "Джынс за свабоду" Яўген Афнагель былі запрошаныя для перамоваў у Менгарвыканкам. З афіцыйнага боку на перамовах з заяўнікамі шэсьця прысутнічалі кіраўнік ідэалягічнага Ўпраўленьня Менгарвыканаму Генадзь Курбека, намесьнік гарадзкога пракурора Алесь Стук і намесьнік начальніка гарадзкой міліцыі Іван Мельнікаў.

Чыноўнікі паведамілі, што адпаведна з заканадаўствам збор людзей на Кастрычніцкай плошчы немагчымы, бо вельмі блізка ад яго знаходзяцца адміністрацыйныя ўстановы, а таксама станцыі мэтро. Спасылаліся на станцыі мэтро чыноўнікі і падчас тлумачэньня таго, чаму нельга весьці шэсьце па праспэкце Незалежнасьці. У выніку заяўнікам быў прапанаваны стандартны варыянт "Акадэмія навук - парк Дружбы народаў". Але прадстаўнікі дэмакратычных сілаў адмовіліся разглядаць гэты маршрут, спасылаючыся на значасьць і важнасьць мерапрыемства. Тады чыноўнікі адказалі, што гатовыя выслухаць прапановы іншых маршрутаў.

У сваю чаргу з боку дэмакратычных лідэраў паступіла прапанова перанесьці месца збору ў сквэр Янкі Купалы. Кіраўнік ідэалягічнага Ўпраўленьня Менгарвыканаму Генадзь Курбека запярэчыў на прапанову тым, што ў парку вядзецца рамонт. Але папрасіў пачакаць адказу яшчэ адзін дзень.

Такім чынам, канчатковы адказ з маршрутам правядзеньня Эўрапейскага Маршу будзе вядомы заўтра ў другой палове дня. У сувязі з гэтым прэс-канфэрэнцыя пераносіцца на сераду (у 12:00).

Паводле лідэра Партыі БНФ Вінцука Вячоркі, перамовы адбыліся. "Нас не паставілі перад фактам забароны, - сказаў Вінцук Вячорка. - Нават калі і фармальныя, але нейкія перамовы паміж намі і ўладамі адбыліся. І гэта ўжо пазытыўны вынік".

Падчас перамоваў Віктар Івашкевіч падкрэсьліў, што мэта акцыі - не крытыкаваць, а паказаць зацікаўленасьць у супрацоўніцтве з Эўропай. "Калі супраць удзельнікаў будуць выкарыстоўвацца шчыты і дубінкі, то гэта вельмі нэгатыўна адлюструецца на іміджы ўлады, - сказаў Віктар Івашкевіч. - І ў гэтым будзе вінаватая менавіта ўлада, а не беларускі народ. Мы не губляем надзеі на тое, што ўлады дазволяць правесьці мірнае шэсьце".



Источник: Объединенная Гражданская Партия

  Обсудить новость на Форуме