19:46 22.03.2010 | Все новости раздела "Объединенная Гражданская Партия"

Рух "Маладая Беларусь" распачаў сацыяльную кампанію

Рух “Маладая Беларусь” сабраў 500 подпісаў грамадзян – жыхароў Куйбышаўскай 46-й выбарчай акругі пад зваротам з патрабаваннем усталяваць светлафор на пешаходным пераходзе на вуліцы Куйбышава.

“Мы, грамадзяне Рэспублікі Беларусь, жыхары вуліцы Куйбышава і Куйбышаўскай выбарчай акругі №46, просім усталяваць светлафор на нерэгуляваным пешаходным пераходзе паміж магазінам “Десяточка” і тарцамі дамоў 81 і 77 па вуліцы Куйбышава.

Дадзены пешаходны пераход  з’яўляецца пераходам  павышанай небяспечнасці  – кожны тыдзень  на ім здараюцца дарожна-транспартныя здарэнні, часцей за ўсё з пацярпелымі пешаходамі”.

Нягледзячы  на наяўнасць рэгулюемага  светлафорам пешаходнага  пераходу з другога  боку магазіна “Десяточка”, многія жыхары раёну  карыстаюцца нерэгулюемым пераходам, а аўтамабілісты, праехаўшы папярэдні  рэгулюемы пераход, неўважліва сочаць за дарожнай сітуацыяй, у выніку чаго здараюцца ДТЗ” – напісана ў звароце.

Па  словах лідэра ММГА “Рух “Маладая Беларусь”  Зміцера Каспяровіча, які мае  намер вылучацца кандыдатам у  дэпутаты па Куйбышаўскай 46-й акрузе, гэтая ініцыятыва ўзнікла невыпадкова.

“Некалькі месяцаў таму на гэтым  пераходзе на маіх вачах быў збіты  чалавек, да якога  ледзь паспела  даехаць “Хуткая  дапамога”. Пераход  гэты знаходзіцца  каля майго дому, і я ведаю, што  ДТЗ з удзелам  пешаходаў здараюцца тут ледзь не кожны тыдзень. Ідэю сабраць подпісы пад такім зваротам падалі мне выбаршчыкі, якія ставілі подпісы ў падтрымку мяне ў якасці кандыдата ў дэпутаты.

Мы  правялі сход жыхароў  бліжэйшых дамоў, і сход даручыў  мне заняцца зборам подпісаў і падаць гэты зварот у Менгарвыканкам і ДАІ. Бліжэйшымі днямі мы перададзім зварот мінскім чыноўнікам, і спадзяюся, яны адрэагуюць на гэта адпаведнымі крокамі.

Такім чынам мы таксама  хочам паказаць грамадзянам, чым насамрэч мусіць займацца мясцовы  дэпутат. Ніхто з тых людзей, якія ставілі подпісы ў маю падтрымку у якасці кандыдата ў дэпутаты і пад зваротам, ня ведае прозьвішча свайго дэпутата.

Мы імкнемся змяніць гэтую сітуацыю. Кожны дэпутат павінен займацца праблемамі жыхароў сваей акругі – будзь то светлафор ці неадрамантаваны ганак пад’езду. І жыхары павінны ведаць, што з кожнай такой праблемай яны могуць прыйсці да дэпутата, за якога галасавалі, і ён мусіць яе вырашаць!

Гэтая акцыя з’яўляецца нашым першым крокам у сацыяльнай кампаніі, якую мы плануем развіваць у розных выбарчых акругах, у першую чаргу ў тых, дзе балатуюцца нашыя актывісты” – сказаў Зміцер Каспяровіч. 

Прэсавая  служба Руху “Маладая  Беларусь”

Источник: Объединенная Гражданская Партия

  Обсудить новость на Форуме