14:45 30.03.2012 | Все новости раздела "Объединенная Гражданская Партия"

Лябедзька: Мэта Лукашэнкі – запалохаць людзей

20120330-lebedko«На наш погляд, гэта спецаперацыя. Яе заказчык ніхто іншы, як Аляксандр Лукашэнка, арганізатар – КДБ, а выканаўцы – шараговыя міліцыянты і суддзі з Оршы», - так расцаніў арышт лідэраў апазіцыі, прысуд і знікненне іх пашпартоў старшыня АГП Анатоль Лябедзька.

Пра гэта ён паведаміў журналістам падчас прэс-канферэнцыі, якая адбылася ў мінскім офісе АГП і была прысвечаная падзеям 27-29 сакавіка ў Оршы.

Нагадаем, у ноч на 28 сакавіка на станцыі “Орша” былі знятыя з цягніка і затрыманыя Анатоль Лябедзька, Сяргей Калякін і Аляксандр Атрошчанкаў, якія накіроўваліся ў Маскву, адкуль планавалі вылецець у Брусель для ўдзелу ў сустрэчы з прадстаўнікамі Еўракамісіі.

Пры затрыманні супрацоўнікі мытні заявілі, што ўсе трое падазраюцца ў транспартаванні наркатычных сродкаў. Пазней іх абвінавацілі ў дробным хуліганстве. Лябедзька, Калякін і Атрошчанкаў былі змешчаныя ў ізалятар часовага ўтрымання. Судовы працэс адбыўся толькі на наступны дзень. Прысуд – штраф у 10 базавых велічынь. Да таго ж палітыкам не вярнулі іх пашпарты.

Адказваючы на пытанне, з якой мэтай была арганізаваная гэтая правакацыя, Анатоль Лябедзька адзначыў:

“Па-першае, Аляксандр Лукашэнка такім чынам спрабуе ўздзейнічаць на Еўрапейскі звяз, на ЗША ды міжнародную супольнасць. Ён шукае інструменты эфектыўнага ўздзеяння ў фармаце шантажу.

Па-другое, відавочны намер унесці раскол унутры апазіцыі, падзяліць яе на нейкую радыкальную частку і больш памяркоўную. Да іх будуць ужывацца розныя інструменты ўздзеяння.

Трэцяя задача, якую, ставіць улада, – запалохаць грамадзян Беларусі, стварыць уражанне татальных рэпрэсій, татальнага кантролю, каб да апазіцыі не далучаліся новыя людзі, і не праяўлялася актыўнасць апазіцыі”.

Источник: Объединенная Гражданская Партия

  Обсудить новость на Форуме