17:30 06.04.2010 | Все новости раздела "Объединенная Гражданская Партия"
Беларусы паміж Усходам і Захадам
Колькасьць тых беларусаў, якія выбіраюць аб’яднаньне з Расеяй ці ўступленьне Беларусі ў Эўрапейскі Зьвяз, складае сёньня 41.4 % і 40.4% адпаведна. Такі адзін з вынікаў сакавіцкага апытаньня, праведзенага ў Беларусі базаваным у Літве Незалежным інстытутам сацыяльна-эканамічных і палітычных дасьледаваньняў (НІСЭПД).
Прапануем вашай увазе яшчэ некалькі вынікаў дасьледваньня.
Ці скончыўся крызіс?
"Пэсымісты", якія чакаюць "паглыбленьня крызісу і нарастаньня зьвязаных з ім праблем", складаюць сёньня чвэрць насельніцтва, столькі ж "аптымістаў", лічыць, што "краіна ўжо пачала выходзіць з крызісу", але самую вялікую групу складаюць тыя, хто лічаць, што "крызіс ужо" дасягнуў дна "і горш не будзе" (38.3%).
Амаль палова рэспандэнтаў (48%) "у поўнай або значнай меры" ўпэўненыя, што гэты крызіс "зьяўляецца сьледзтвам эканамічнай палітыкі кіраўніцтва краіны апошніх гадоў".
68.3% беларускіх грамадзянаў ня вераць у тое, што ўлады змогуць выканаць рашэньне ІІІ Усебеларускага народнага сходу, паводле якога да канца 2010 году сярэдні заробак у Беларусі павінен скласьці 500 даляраў.
На палітычным Алімпе – без пераменаў
На адкрытае пытаньне: "Калі б заўтра адбыліся выбары прэзыдэнта Беларусі, за каго б Вы прагаласавалі?" А. Лукашэнка атрымлівае 42.7%, што амаль у дзесяць разоў перавышае рэйтынг яго "найбліжэйшага" суперніка ад апазыцыі А. Мілінкевіча (4.7%).
На пытаньне: "Дзейнасць" вэртыкалі ўлады", створанай прэзыдэнтам А. Лукашэнкам, на Ваш погляд, прыносіць краіне больш карысьці ці больш шкоды?" траціна адказала - "больш шкоды", 41% - "больш карысьці".
“Выбары нічога не вырашаюць, але пайду галасаваць”
36.% рэспандэнтаў ня ведаюць, калі адбудуцца выбары ў мясцовыя Саветы
На думку 82.4% апытаных мясцовыя Саветы практычна не ўплываюць на іх жыцьцё (у тым ліку 46.2% - "наогул не ўплываюць", а не змаглі адказаць на гэтае пытаньне 3%)
Амаль 63% апытаных у сакавіку сказалі, што зьбіраюцца галасаваць на выбарах у мясцовыя Саветы
Больш за 70% лічаць, што ў выбарчыя камісіі павінны ўваходзіць прадстаўнікі ўсіх палітычных сілаў, у тым ліку і апазыцыі, амаль 74% - што на выбарчых участках павінны прысутнічаць назіральнікі ад усіх палітычных сілаў, у тым ліку і ад апазыцыі.
Геапалітычныя ростані
Колькасьць гатовых выбіраць паміж аб’яднаньнем з Расеяй і ўступленьнем ў Эўрапейскі Зьвяз складае сёньня 41.4 % і. 40.4% адпаведна.
На пытаньне: "Ад каго, на Вашу думку, сыходзіць пагроза для Беларусі?" палова рэспандэнтаў адказала, што Беларусі ніхто не пагражае.
Ацэньваючы наступствы дыпляматычнага канфлікту паміж Беларуссю і ЗША, які разгарэўся вясной 2008 г., адносная большасьць апытаных (47.5%) адказала, што абавязкова трэба аднавіць нармальныя адносіны з ЗША (не абавязкова — толькі 19.1%).
Адказваючы на пытаньне аб тым, хто вінаваты ў вострым канфлікце, які разгарэўся нядаўна паміж Беларусьсю і Расеяй наконт паставак нафты ў Беларусь, звыш 50% сказалі "абодва бакі ў роўнай ступені" ("расейскія ўлады" — менш за чвэрць).
Саюз палякаў і указ пра рэгуляваньне інтэрнэту
Наконт канфлікту паміж уладамі і сябрамі незарэгістраванага Саюза палякаў Беларусі на чале з Анжалікай Борыс, на думку адной траціны апытаных, у канфлікце вінаватыя абодва бакі, яшчэ траціна не змагла адказаць , і апошняя траціна падзялілася паміж прыхільнікамі аднаго з бакоў.
Колькасьць тых, хто лічыць, што нядаўна прыняты ўказ прэзыдэнта аб рэгуляваньні Інтэрнэту дасьць магчымасьць перасьледаваць людзей, што распаўсюджваюць непажаданую ўладам інфармацыю, блякаваць апазыцыйныя інтэрнэт-рэсурсы падчас выбарчых кампаніяў, і таму сур’ёзна абмяжуе свабоду слова (42.7%), удвая перавышае колькасьць тых, хто лічыць , што наадварот, указ дапаможа разьвіцьцю беларускага інтэрнэту (21.4%).
Обсудить новость на Форуме