00:31 31.12.2009 | Все новости раздела "Объединенная Гражданская Партия"

Беларусь – 2009: адаптацыя да будучыні замест кансервацыі мінулага

Галоўная падзея 2009 года – гэта канчатковы крах праекта прадухілення будучыні ў Беларусі. Гэты праект, свядома ці падсвядома, рэалізоўваўся ў нашай краіне апошнія 15 гадоў. Галоўнай яго мэтай было захаванне ўлады. А паколькі ўлада трымалася на настальгіі па мінулым, то будучыня была пагрозай.

Кансервацыя і  рэстаўрацыя мінулага праяўлялася  ва ўсім: гэта і татальны кантроль над  эканомікай з манаполіяй дзяржаўнага  сектару, спробамі знішчэння прадпрымальнікаў і кантрактнай сістэмай для работнікаў масавых прафесій. Гэта і пазбаўленне грамадзян права выбару шляхам адмовы ад падліку галасоў, калі “спіс пераможцаў” абіраецца ў першым туры, а назіральнікі не бачаць бюлетэняў. Гэта і спробы знішчэння апазіцыі, грамадзянскай актыўнасці і свабоды слова. Гэта і вяртанне старых сімвалаў, гімнаў і заклінанняў.

У выніку ў краіне была створана атмасфера страху, на якой толькі і можа трымацца квазісавецкі рэжым. Аднак такі рэжым не можа быць эфектыўным, бо ён выкарыстоўвае прымус, а не ініцыятыву людзей.

Здаровы сэнс падказвае, што прадухіленне будучыні не мае гістарычнай перспектывы. Такія праекты патрабуюць велізарных рэсурсаў, і чым далей, тым больш. Раней ці пазней рэсурсы канчаюцца, і тады “прагматыкі”, якія раней падтрымлівалі рэжым, з лёгкасцю “здаюць” яго, ловячы новыя тэндэнцыі.

У 2009 годзе стала  відавочным, што рэсурсы для падтрымкі  старога праекту скончыліся. Праект кансервацыі мінулага мяняецца на праект адаптацыі да непазбежнай будучыні. Улада вымушана была пайсці на прыватызацыю, дэклараваць лібералізацыю і паляпшэнне адносінаў з цывілізаванымі краінамі. Беларусь стала ўдзельніцай праграмы Еўрапейскага Саюзу “Усходняе партнёрства”. Усё гэта стварае новую тэндэнцыю вяртання Беларусі на шлях цывілізаванага дэмакратычнага развіцця.

Источник: Объединенная Гражданская Партия

  Обсудить новость на Форуме