19:00 21.03.2012 | Все новости раздела "Объединенная Гражданская Партия"
Актывісту АГП не дазволілі зладзіць пікет супраць росту цэнаў
Баранавіцкі гарвыканкам забараніў пікет супраць росту цэнаў, які актывіст АГП Рыгор Грык плянаваў зладзіць 25 сакавіка. Рыгор Грык зьвязвае забарону з Днём Волі.
Пікет плянаваўся ў Старым парку Баранавічаў. Рыгор Грык кажа, што замовіў яго за месяц да правядзеньня, аднак пікет забаранялі двойчы:
«Я заключыў неабходныя дамовы на абслугоўваньне пікету. Аднак 7 чысла мне прыйшоў адказ, што я парушаю закон аб масавых мерапрыемствах, а менавіта пункт 5 гэтага закону. Я схадзіў да юрыстаў, і мне патлумачылі, што я не ўказаў крыніцу фінансаваньня пікету. Ну, то я выправіў, пазначыўшы, што фінансуецца з асабістых сродкаў і ізноў занёс заяву.
Аднак сёньня ў лісьце гарвыканкаму мне паведамілі, што не даюць дазвол на правядзеньне пікету. І ізноў не тлумачаць ніякіх прычын. У аддзеле ідэалёгіі мне паведамілі, што калі я ня згодны з забаронай пікету, то магу зьвяртацца ў суд», — кажа Рыгор Грык.
Актывіст распавёў, што не плянуе зьвяртацца ў суд, бо ня мае на гэта сродкаў ды ня верыць у станоўчае рашэньне суду. Рыгор Грык мяркуе, што асноўнай прычынай забароны пікету было тое, што 25 сакавіка сьвяткуецца Дзень Волі.
Спадар Грык кажа, што ў мінулым годзе ў Баранавічах улады дазволілі толькі адзін пікет. Ён быў таксама на тэму росту цэнаў і прайшоў пад лёзунгам «За жыцьцё без хлусьні і фальшу».
Обсудить новость на Форуме