14:30 04.09.2008 | Все новости раздела "Белорусская социал-демократическая партия (Грамада)"

У СЛУЦКУ ЧЫНОЎНІК АБЛАЯЎ КАНДЫДАТА Ў ДЭПУТАТЫ

    Пакрыўджаны вылучэнец АДС Анатоль Юрэвіч выклікае ў суд вэртыкальніка Аляксандра Драко.
    Канфлікт між афіцыйным валадарам Случчыны і кандыдатам на дэпутата ў парлямэнт адбыўся ў будынку СШ №9 на сходзе з выбарцамі, які арганізавалі і праводзілі мясцовыя чыноўнікі. Прысутным тлумачылі, чаму трэба галасаваць за кандыдата ад улады – 24-гадовую Інэсу Кляшчук, якая цяпер зьяўляецца першым сакратаром Слуцкага гарадзкога камітэту БРСМ.
    Прысутнічаў на гэтым сходзе і кіраваў ім старшыня Слуцкага райвыканкаму Аляксандр Драко. Сярод больш як паўсотні людзей у залі быў кандыдат у дэпутаты Палаты прадстаўнікоў па Слуцкай выбарчай акрузе №74 Анатоль Юрэвіч. Ён кажа:
    – Пра сход у СШ №9 паведаміла райгазэта "Слуцкі край", акрамя таго мяне асабіста запрасілі некаторыя з настаўнікаў гэтай школы.
    Адзначу, Анатоль Юрэвіч – адзіны ў названай вышэй акрузе супернік Інэсы Кляшчук. Ён – сябра Беларускай сацыял-дэмакратычнай партыі (Грамада), часова не працуе. Бацька дваіх дзяцей. Былы прадпрымальнік, прыватны бізнэс якога быў спынены ўладай у 2006 годзе. Тады Анатоль Юрэвіч дапамагаў Аляксандру Мілінкевічу змагацца на прэзыдэнцкіх выбарах.
    На сходзе, як высьвятляецца, Юрэвіч узьняў руку на прапанову Аляксандра Драко: "Хто жадае выказацца?"
    – Натуральна, я вінаваціў мясцовую ўладу за пралікі ў працы камунальнай гаспадаркі, за дрэнны стан дарог у ваколіцах райцэнтру, за разгон прадпрымальнікаў і г.д. Таксама папрасіў людзей выглянуць за вакно і паглядзець на аўтамабіль чыноўніка. Сказаў, што бліскучы мэрсэдэс пана Дракі каштуе сто з гакам мільёнаў беларускі рублёў. "Вось дзе вашы грошы"! – заявіў я выбарцам.
    Сьведкі зь боку кандыдата цяпер гавораць: слуцкі мэр Драко неаднаразова перапыняў прамоўцу, пярэчыў яму, а пасьля "выліў вядро бруду".
    Спадарыня Валянціна:
    – Аляксандар Драка не выбіраў слоў, ён нават крычаў на Анатоля: "Хлус, баламут, бяздарнасьць"! Пры гэтым наваліўся і на супрацоўнікаў ідэалягічнага аддзелу, вінаваціў, што не даглядзелі, прапусьцілі апазыцыянэра.
    Анатоль Юрэвіч:
    – Сёньня ж аформіў зыск у суд, патрабую, каб Аляксандар Драко адказваў за асабістую зьнявагу. Зьвяртаюся таксама ў гарадзкую пракуратуру Слуцка. Ніякім чынам нельга прабачаць такую абразу.
        Галіна Баравая 04.09.2008



Источник: Белорусская социал-демократическая партия (Грамада)

  Обсудить новость на Форуме