06:30 07.08.2008 | Все новости раздела "Белорусская социал-демократическая партия (Грамада)"

САЦЫЯЛ-ДЭМАКРАТЫЧНАЯ РАКІРОЎКА

   На адбыўшымся ў мінулую нядзелю пазачарговым з'ездзе Беларускай сацыял-дэмакратычнай партыі (Грамада) Анатоль Ляўковіч змяніў на пасадзе старшыні Аляксандра Казуліна
     Нагадаем, што спачатку гэты з'езд планавалася правесці як тэхнічны. На ім павінны былі толькі вылучыць ад партыі патэнцыяльных кандыдатаў у дэпутаты Палаты прадстаўнікоў. Аднак большасць дэлегатаў (а іх з'ехалася 76 з 86 абраных) запатрабавала ўключыць у парадак дня пытанне аб пераабранні партыйнага кіраўніцтва. На пасаду старшыні партыі спачатку вылучылі чатыры асобы. Аднак Алег Трусаў і Мечыслаў Грыб адмовіліся балатавацца. Таму прэтэндэнтаў засталося двое: старшыня партыі Аляксандр Казулін, які знаходзіцца за кратамі, і выканаўца абавязкаў старшыні партыі Анатоль Ляўковіч.
     53 дэлегаты прагаласавалі за Ляўковіча, 22 — супраць. Такім чынам, Аляксандра Казуліна абвясцілі ганаровым старшынёй партыі і фактычна адсунулі ад кіраўніцтва.
     
     З ПЕРШЫХ ВУСНАЎ
     Анатоль ЛЯЎКОВІЧ: «З'езд рэальна ацаніў ролю людзей у партыі»
     Пасля з'езда яго рашэнне пракаментаваў новы старшыня Беларускай сацыял-дэмакратычнай партыі (Грамада) Анатоль ЛЯЎКОВІЧ:
     — Адразу хачу адзначыць, што камісіяй па падрыхтоўцы з'езда не ўносілася пытанне аб змене кіраўніцтва партыі. Гэтае пытанне паднялі дэлегаты з'езда. І шмат хто з іх спасылаўся на звароты самога Аляксандра Казуліна да ўсіх сяброў партыі. А такіх зваротаў было два, і Аляксандр Уладзіслававіч сам ставіў пытанне аб тым, каб на гэтым з'ездзе было зменена кіраўніцтва партыі. І ініцыятыва гэтая прагучала яшчэ да пахавання Ірыны Іванаўны. А пасля Аляксандр Казулін паўтарыў яе. Акрамя таго, Аляксандр Уладзіслававіч тады падняў і пытанне аб стварэнні ў партыі фракцыі. У той сваёй заяве каардынатарам фракцыі была прызначана старэйшая дачка Аляксандра Казуліна — Вольга. Пасля чаго, на маю думку, фракцыя і распачала партыйныя рознагалоссі. Зразумела, што многім гэта не падабалася — партыя павінна быць стабільнай, арганізаванай, павінна эканамічна развівацца… Вынікі галасавання вам вядомы. Па аб'ектыўных прычынах не прыехалі толькі 9 дэлегатаў, так што з'езд прайшоў вельмі арганізавана. І ўсе сышліся аднадушна — партыю трэба прывесці ў адэкватны стан. Што гэта значыць? У 2005 годзе я змяніў Мікалая Статкевіча на пасадзе старшыні партыі, і з таго часу займаўся ўсімі арганізацыйнымі і аператыўнымі пытаннямі. Калі ў партыю прыйшоў Аляксандр Уладзіслававіч, адразу пачалася прэзідэнцкая кампанія, і ў яго проста не было часу займацца партыяй. А пасля яго пасадзілі ў турму. Натуральна, што зараз адтуль ён не можа аператыўна арганізоўваць і ўпраўляць партыяй з-за таго, што не атрымлівае адэкватнай і дакладнай інфармацыі. Інфармацыя ішла праз Ігара Рынкевіча, праз каго-небудзь яшчэ… Але на прэзідыуме партыі з Рынкевіча знялі статус прадстаўніка Казуліна. Менавіта за тое, што той займаўся дэзінфармацыяй аб стане ў партыі. 28 лютага на месца Рынкевіча была прызначана Вольга Казуліна. Але з таго часу яна не прыехала ні ў адну арганізацыю, не пацікавілася, чым жыве партыя, ні разу не сустрэлася з кіраўніцтвам партыі… Хоць мы неаднойчы дамаўляліся аб сустрэчах. І гэта гаворыць пра тое, што Вольга Казуліна таксама не магла валодаць аб'ектыўнай інфармацыяй аб стане ў партыі, і, суадносна, не магла даваць такую Аляксандру Уладзіслававічу Казуліну. Таму з'езд рэальна ацаніў сітуацыю і ролю людзей у партыі.
     А Аляксандра Казуліна мы абвясцілі ганаровым старшынёй і тым самым, на мой погляд, яшчэ вышэй паднялі яго статус у вачах грамадскасці Беларусі і замежжа. Таму што шмат партый і старшынь, а ганаровых — на пальцах пералічыць можна. Такім з'яўляецца, здаецца, толькі Станіслаў Багданкевіч у Аб'яднанай грамадзянскай партыі.
     
     АЛЬТЭРНАТЫВА
     Вольга КАЗУЛIНА: «З гэтага моманту палітычная кар'ера Ляўковіча пойдзе на спад…»
     Мы звярнуліся за каментарыем рашэння партыі і да Вольгі КАЗУЛІНАЙ.
     — Спадар Ляўковіч дабіўся таго, чаго заўсёды хацеў — стаць старшынёй партыі, — кажа яна. — Але, як мне падаецца, яго палітычная кар'ера з гэтага моманту пойдзе на спад. Таму што з такімі людзьмі на міжнародным узроўні ніхто не будзе мець зносіны. Мала таго, што ён падставіў сябе, дык яшчэ і зняславіў усю партыю. Проста вельмі шкада тых людзей, якія рызыкуюць сваімі свабодамі, сем'ямі, работай… Якія ўступілі ў партыю і не пабаяліся гэтага. А іх узялі і падставілі.
     — Ініцыятыва аб змене кіраўніцтва насамрэч сыходзіла ад Аляксандра Уладзіслававіча?
     — Так, ён і праўда быў незадаволены кіраўніцтвам партыі. І некалі гэтыя пытанні трэба было вырашаць, бо іх назбіралася вельмі шмат. Пачаліся нават фальсіфікацыі дакументаў, і, натуральна, нікому гэта не падабалася. Але за дзень да з'езда я патэлефанавала спадару Ляўковічу і сказала, што мы не будзем ініцыяваць пытанне аб змене кіраўніцтва. Таму што зараз на парадку дня — парламенцкія выбары. Кампанія вельмі сур'ёзная, нервовая і небяспечная. Я прапанавала Анатолю Ляўковічу правесці з'езд мірна і ціха. Таму што ў нас ёсць іншыя мэты. На што было адказана: "Усё так і будзе". А на наступны дзень былі абліты брудам і Аляксандр Казулін, які знаходзіцца ў няволі, і я. Самае цікавае, што мяне ў якасці дэлегата з'езда не прызналі, хоць я з'яўляюся прамым прадстаўніком Аляксандра Уладзіслававіча.
     — Анатоль Іосіфавіч сцвярджае, што вы не сустракаліся з прадстаўнікамі партыі, не валодалі аб'ектыўнай інфармацыяй…
     — Давайце пачнём з таго, што я езджу па рэгіёнах — была ў Магілёве, Бабруйску… Але калі аднойчы на прэзідыуме я папрасіла, каб мяне ўключылі ў склад дэлегацыі, якая ездзіць і сустракаецца з людзьмі, то мне сказалі: "Дзяўчынка, а хто ты тут такая? Ты што, задумала нас кантраляваць? Ідзі туды, адкуль прыйшла". Вось вам адказ на тое, ці хацеў Ляўковіч, каб я прадстаўляла Казуліна. Хоць мяне зараз разоў у дзесяць больш, чым Ляўковіча, запрашаюць на сустрэчы і ў Еўропу, і ў Амерыку. Напэўна, гэта не ўсім падабалася.
     — Тым не менш Аляксандр Казулін абраны ганаровым старшынёй партыі… Што ж за крыўды могуць быць?
     — На мой погляд, зроблена гэта толькі для таго, каб карыстацца прозвішчам Казуліна. Думаю, што гэта не атрымаецца. Я паслала тату тэлеграму, дзе поўнасцю апісала з'езд. І, як мне падаецца, у хуткім часе чакайце ад Аляксандра Казуліна гучных заяў.
     Алесь СІВЫ
     
     АД РЭДАКЦЫІ
     Чакаем…
     Але ўжо відавочна, што абодва бакі маханулі шашкамі і нічога добрага з гэтага не атрымалася. Спадарыні Вользе сапраўды, напэўна, трэба было больш працаваць з сябрамі партыі. Візіты ў Еўропу і ЗША — патрэбная рэч, але лёс партыі, лёс краіны вырашаецца тут, у Беларусі. А спадару Ляўковічу неабходна задумацца, ці сапраўды ўсё так добра, калі ў партыі адбываецца скандал за скандалам. І каго БСДП будзе вылучаць кандыдатам у прэзідэнты — А.Казуліна ці...?
          7.08.2008   фб15-116 



Источник: Белорусская социал-демократическая партия (Грамада)

  Обсудить новость на Форуме