08:15 06.07.2008 | Все новости раздела "Белорусская социал-демократическая партия (Грамада)"

Магілёўшчына: у “аб’яднаных” сьпісах няма сябраў ПКБ

Магілёўскія рэгіянальныя арганізацыі палітычных партыяў апазыцыі вызначылі прозьвішчы 28 кандыдатаў у дэпутаты Палаты прадстаўнікоў. Значная частка зь іх зьбіраецца ўдзельнічаць у выбарчай кампаніі ўпершыню.
    На Магілёўшчыне трынаццаць выбарчых акругаў. Кіраўнік рэгіянальнай арганізацыі партыі БНФ Рыгор Кастусёў кажа, што на сёньня для працы ў камісіях вылучана 14 чалавек. Таксама суразмоўца адзначае, што ў сьпісе патэнцыйных кандыдатаў у дэпутаты ад апазыцыі — 28 чалавек:
    “На першым этапе было ахвочых пад пяцьдзясят чалавек. На сёньня сьпіс прасеяўся, і мы сышліся на тым, што ў сярэднім будзе два чалавекі на акругу. Але мяркую, што будзе яшчэ менш. Многія аб’ядноўваюць свае каманды й гатовыя працаваць на кагосьці аднаго”, — зазначае Рыгор Кастусёў.
    У агульным выбарчым сьпісе аб’яднаных дэмакратычных сілаў Магілёўшчыны няма вылучэнцаў рэгіянальнай арганізацыі Камуністычнай партыі Беларускай. Старшыня арганізацыі Валер Беразіенка зазначае, што падчас дэбатаў камуністы саступілі прадстаўнікам іншых партыяў:
    “Ну што, мы будзем падначальвацца і ня будзем іх вылучаць, хаця ёсьць дужа годныя людзі. Мы дапамагаем нашым таварышам з аб’яднаных дэмакратычных сілаў”.
    Значная частка патэнцыйных кандыдатаў у дэпутаты палаты прадстаўнікоў з Магілёўшчыны ў выбарчай кампаніі возьме ўдзел упершыню. Сярод іх — прадпрымальніца з Бабруйску Алена Мядзьведзева. Яна зазначае, што асноўным пунктам яе выбарчай праграмы будзе скасаваньне прэзыдэнцкага ўказу № 760, які забараняе індывідуальным прадпрымальнікам выкарыстоўваць наёмную працу асобаў, якія не даводзяцца ім блізкімі сваякамі. Паводле спадарыні Мядзьведзевай, праблемы, выкліканыя гэтым указам, застаюцца для прадпрымальнікаў актуальныя і дагэтуль:
    “У нас у палаце прадстаўнікоў няма ніводнага афіцыйна зарэгістраванага прадпрымальніка. Таму прымаюцца такія законы. Я людзям кажу: давайце зробім так, каб у Палаце прадстаўнікоў сядзелі хоць некалькі прадпрымальнікаў, бо толькі яны могуць абараніць вашы інтарэсы”. 04.07.2008 15:17



Источник: Белорусская социал-демократическая партия (Грамада)

  Обсудить новость на Форуме