05:01 12.06.2010 | Все новости раздела "Белорусская социал-демократическая партия (Грамада)"
З партыі БНФ выключаць Вінцука і Франка Вячорку?
Cойм Партыі БНФ у суботу, 12 чэрвеня, разгледзіць пытаньні далейшага сяброўства ў партыі шэрагу яе чальцоў. З такой ініцыятывай выступіў старшыня партыі Аляксей Янукевіч. Кіраўнік партыі вінаваціць сваіх паплечнікаў у парушэньні статуту. У сваю чаргу кандыдаты на выключэньне заяўляюць пра непрадуманую палітыку кіраўніцтва Партыі БНФ.
Напярэдадні сойму Аляксей Янукевіч паведаміў, што пытаньне магчымага выключэньня з партыі будзе тычыцца чальцоў «Моладзі БНФ»: Франка Вячоркі, Андруся Крэчкі, Антона Койпіша і некаторых іншых партыйцаў:
«У партыі існуе шэраг асобаў, якія зьяўляюцца сябрамі партыі, але пры гэтым мэтанакіравана працуюць выключна на зьнішчэньне партыі і прычыненьне ёй як мага большай шкоды. Гаворка як пра інфармацыйную, так і пра матэрыяльную шкоду. Гэтая сытуацыя ня можа быць пакінутай без разгляду і бліжэйшы сойм, які адбудзецца ў суботу, разгледзіць усе такія выпадкі. Што тычыцца пэўных прозьвішчаў, то прэтэнзіі тычацца ня толькі гэтых асобаў, але і шэрагу іншых. На маю думку, ёсьць відавочнае парушэньне рашэньняў пра захаваньне партыйнай дысцыпліны з боку 5-6 сябраў партыі».
Паводле Аляксея Янукевіча, магчыма, што разгляд кадравых пытаньняў будзе тычыцца некаторых сяброў рэвізійнай камісіі, а таксама аднаго з заснавальнікаў партыі, былога старшыні Вінцука Вячоркі.
Сваё магчымае выключэньне з шэрагаў Партыі БНФ спадар Вячорка пракамэнтаваў гэтак:
«Лукашэнка ў Маскве: рыхтуюцца да продажу нафтагазаправоды і Салігорск. Вакол нас адбываецца сур’ёзны геапалітычны працэс, які суправаджаецца заявай расейскага амбасадара Сурыкава, што адзіны прарасейскі кандыдат — гэта Лукашэнка. Ёсьць пра што гаварыць адказным палітычным сілам, да якіх я па традыцыі адношу і Партыю БНФ. Замест гэтага прапаноўваюцца побытавыя сваркі, як правіла справакаваныя, каб распраўляцца з партыйнай моладзьдзю, падрываць аўтарытэт сьвежавылучанага кандыдата Кастусёва, які замест таго, каб кансалідаваць людзей, будзе асьвячаць сваёй прысутнасьцю, справакаваны кіраўніцтвам раскол. Вось да чаго можа давесьці, мякка кажучы, непрадуманая палітыка».
Яшчэ адзін з папярэднікаў цяперашняга кіраўніцтва, які быў сярод заснавальнікаў Партыі БНФ, сябра сойму Віктар Івашкевіч гэтак пракамэнтаваў падзеі напярэдадні паседжаньня:
«Я лічу, што не да месца ўвогуле такі пункт парадку дня. Замест таго, каб думаць, як змагацца з рэжымам, яны займаюцца мышынай валтузьнёй. А што рабіць — як я тое думаю — я скажу на сойме».
Галіна Абакунчык
* * *
Валянцін Голубеў: Мы былі бедныя, але сумленныя і незалежныя
На заўтра запланаванае паседжанне Сойму БНФ. Чакаецца, што сярод іншых кадравых пытанняў якія будуць разглядацца стане і пытанне выключэння з шэрагаў партыі некалькі іх маладзёвых лідараў, якія нязгодныя з палітыкай цяперашняга кіраўніцтва БНФ.
Былы намеснік старшыні партыі і адзін з яе стваральнікаў Валянцін Голубеў лічыць, што ўсе разнагалоссі ў партыі гэта вынік канкрэтных дзеянняў накіраваных не на змаганне за ідэалы, а за уласныя карысці:
- Калі Аляксандр Мілінкевіч перастаў быць адзіным і не здолеў стварыць ні ўласную, а ні палітычную структуру, то ён пачаў перакупляць за грошы людзей з іншых палітычных структураў у сваю арганізацыю, Рух "За Свабоду". Калі мы былі ў Беларускім Народным Фронце мы ніколі ні ад каго не бралі ніякіх грошаў, мы былі бедныя, але сумленныя і незалежныя.
Валянцін Голубеў выказаўся ў патрыку тых маладзёвых лідараў, якіх плануюць заўтра выключыць з шэрагаў партыі, адзначыў таксама, што прымаць ўдзелу ў працах партыі, якая згубіла свае ідэалы дзеля канкрэтных матэрыяльных карысцяў яму не дазваляе сумленне.
Валя Лаеўская, .
Обсудить новость на Форуме