17:45 22.05.2016 | Все новости раздела "Белорусская социал-демократическая партия (Грамада)"

У Жодзіне затрымалі ўдзельнікаў мітынгу салідарнасці (дап)

У горадзе Жодзіне Менскай вобласці затрыманы 4 грамадскіх актывіста, якія ўдзельнічалі ў мітынгу салідарнасці з прадпрымальнікамі. Як нагадаў сустаршыня аргкамітэту па стварэнні партыі Беларуская Хрысціянская дэмакратыя Павел Севярынец, два падобныя мітынгі ўжо прайшлі ў Барысаве і Маладэчне.

Наступныя запланаваны ў Воршы – 31-га траўня і ў Баранавічах – 4-га чэрвеня. А 21-га траўня мітынг павінен быў адбыцца ў Жодзіне. Некалькі актывістаў аргкамітэту па стварэнні прафсаюзу „Салідарнасць” пачалі яго на мясцовым кірмашы:

– Узяўшы мегафон яны прайшліся па гандлёвых радах. Па загадзе кіраўніцтва мясцовай міліцыі іх затрымалі. На месцы быў аформлены пратакол на Івана Помаза, Алеся Абрамовіча забралі ў машыну, а чатырох астатніх павялі пад канвоем у гараддзел міліцыі Жодзіна.

На іх складзены пратаколы аб ўдзеле ў несанкцыянаваным мерпрыемстве. У выніку грамадскія актывісты Алесь Макаеў, Павел Пракаповіч, Павел Старавойтаў і Міхась Латышаў пакінуты пад арыштам да суду, які павінен адбыцца ў панядзелак 23-га траўня. Толькі Алесь Абрамовіч быў адпушчаны па стане здаро’ўя. У міліцыі адмовіліся ўзяць харчовыя перадачы для затрыманых, – адзначыў Павел Севярынец. Ён таксама падкрэсліў, што арышты адбыліся падчас сустрэчы Аляксандра Лукашэнкі з Папам Рымскім. „Таму тое, што адбылося ў Жодзіне – гэта дэманстратыўны плявок ў твар тым еўрапейцам, якія спадзяваліся на лібералізацыю ў Беларусі і канешне ж, плявок у твар беларусам,” – сказаў Павел Севярынец.
Генадзь Барбарыч, Беларускае Радыё Рацыя

* * *

23 траўня ў Жодзіне пройдуць суды над затрыманымі прадпрымальнікамі


23 траўня ў Жодзіне пройдуць суды над затрыманымі прадпрымальнікамі, якія збіралі подпісы супраць указа №222.

Міліцыя затрымала намесніка старшыні руху салідарнасці “Разам” Алеся Макаева, актывіста руху Міхася Латышава, сябра БСДП(Грамады) Алеся Абрамовіча, актывіста БХД Паўла Пракаповіча і актывіста Маладога фронту Паўла Старавойтава.

21 траўня ў Жодзіне мусіў адбыцца мітынг, запланаваны аргкамітэтам салідарнасці з прадпрымальнікамі, але ўлады адмовілі ў яго правядзенні, як раней у Барысаве і Маладзечне. Падчас акцыі былі затрыманыя 5 чалавек. З пастарунка вызвалены толькі Алесь Абрамовіч, які меў пры сябе пасведчанне інваліда. У ізалятары часовага ўтрымання адмовіліся прыняць ваду і ежу. Якую спрабаваў перадаць Алесь Абрамовіч.

Астатніх актывістаў трымаюць за кратамі ў антысанітарных умовах да суда, які адбудзецца ў панядзелак 23 траўня. Судзіць будуць шасцярых чалавек: Алеся Макаева, Міхася Латышава, Алеся Абрамовіча, Паўла Пракаповіча, Паўла Старавойтава і Івана Памаза. Пратаколы, складзеныя на актывістаў прадпрымальніцкага руху, нічым не адрозніваюцца ад пратаколаў, якія складаліся на ўдзельнікаў іншых мітынгаў за апошні час.



Источник: Белорусская социал-демократическая партия (Грамада)

  Обсудить новость на Форуме