09:00 02.09.2015 | Все новости раздела "Белорусская социал-демократическая партия (Грамада)"

У СУВЯЗІ З ВЫЗВАЛЕННЕМ ПАЛІТВЯЗНЯЎ

У СУВЯЗІ З ВЫЗВАЛЕННЕМ ПАЛІТВЯЗНЯЎ

Заява Прэзідыума

Беларускай сацыял-дэмакратычнай партыі (Грамады)

Беларуская сацыял-дэмакратычная партыя (Грамада) вітае вызваленне Ігара Аліневіча, Яўгена Васьковіча, Мікалая Дзядка, Арцёма Пракапенкі, Юрыя Рубцова і Мікалая Статкевіча.

Вызваленнем Ігара Аліневіча, Яўгена Васьковіча, Мікалая Дзядка, Арцёма Пракапенкі, Юрыя Рубцова і Мікалая Статкевіча ўлады прызналі, што ў нашай краіне ёсць палітычныя вязні, што гэтыя грамадзяне былі пазбаўлены свабоды за палітычную дзейнасць.

Выхад палітычных вязняў з месцаў зняволення стаў магчымы ў выніку салідарных дзеянняў беларускай дэмакратычнай супольнасці, а таксама міжнароднай падтрымкі яе патрабаванняў з боку міжнародных структур. Яшчэ адным немалаважным чыннікам, які змусіў улады вызваліць палітвязняў, з’яўляюцца эканамічныя праблемы дзяржавы, у значнай меры спароджаныя некампэтэнтнай палітыкай кіруючай групоўкі.

Такім чынам, вызваленне палітычных вязняў не ёсць акт добрай волі ўладаў. Гэта акт, здзейснены з меркантыльных інтарэсаў.

Выхад Ігара Аліневіча, Яўгена Васьковіча, Мікалая Дзядка, Арцёма Пракапенкі, Юрыя Рубцова і Мікалая Статкевіча з месцаў зняволення не азначае, што яны сапраўды атрымалі свабоду. У Беларусі наогул няма паўнаты грамадзянскіх і палітычных свабод. Што ж датычыць вызваленых палітвязняў, дык над імі ўстаноўлены галосны нагляд, іх свабода абмежавана самым непасрэдным чынам. Яны пазбаўлены права актыўна ўдзельнічаць у грамадска-палітычным жыцці краіны. Не выключана, што ў выпадку перамены палітычнай сітуацыі яны могуць зноў стаць вязнямі.

Беларуская сацыял-дэмакратычная партыя (Грамада) заклікае ўлады зняць судзімасць і цалкам рэабілітаваць раней асуджаных па палітычных матывах Ігара Аліневіча, Яўгена Васьковіча, Мікалая Дзядка, Арцёма Пракапенкі, Юрыя Рубцова і Мікалая Статкевіча.

Беларускія сацыял-дэмакраты па-ранейшаму настойваюць на неабходнасці змянення палітычнага рэжыму ў краіне, няўхільнага захавання эканамічных, сацыяльных, культурных, грамадзянскіх і палітычных правоў і свабод чалавека.

30 жніўня 2015 г.

Источник: Белорусская социал-демократическая партия (Грамада)

  Обсудить новость на Форуме