23:15 05.12.2013 | Все новости раздела "Белорусская социал-демократическая партия (Грамада)"

Сьцяжкі ў аўтобусах парушаюць правілы дарожнага руху

Кіраўніцтва аб’яднаньня «Магілёўаблаўтатранс» падзякавала сябру Беларускай сацыял-дэмакратычнай партыі (Грамады) Ігару Барысаву за зьвесткі пра наяўнасьць у кабінах кіроўцаў аўтобусаў лішніх прадметаў, такіх як сьцяжкі і вымпелы.

Як зазначаецца ў адказе на скаргу актывіста, з кіроўцамі праведзеная тлумачальная праца і ў выпадку паўторнага парушэньня правілаў дарожнага руху іх прыцягнуць да дысцыплінарнага пакараньня.

Ігар Барысаў скардзіўся на тое, што аўтобусьнікі вывешваюць у кабінах менавіта расейскую атрыбутыку. Ён акцэнтаваў увагу на недапушчальнасьці выкарыстаньня такой сымболікі ў грамадзкім транспарце, бо, паводле актывіста, вывешваньне расейскіх сьцягоў у аўтобусах — выклік як беларускай дзяржаўнасьці гэтак і грамадзянам краіны.

У адказе на скаргу няма згадкі пра расейскую атрыбутыку. У ёй зазначаецца, што кіроўцаў абавязалі зьняць у кабінах усё лішняе і што гэтае пытаньне пастаўленае на кантроль.

«Прыемна, што „Магілёўаблаўтатранс“ прыслухаўся да заўваг і даў загад прыбраць расейскія сьцяжкі ня толькі з ўсіх аўтобусаў, але і з усіх грузавых аўтамабіляў. Тым ня менш складаецца ўражаньне, што гэтая арганізацыя жыве ў савецка-расейскай рэчаіснасьці, а ніяк не ў незалежнай Беларусі. Скаргу я пісаў па-беларуску, а мне далі адказ па-расейску. Няўжо там не знайшлося кампэтэнтнага супрацоўніка, які б здолеў падрыхтаваць адказ на беларускай мове? Гэта ганьба і зьнявага. Я зьбіраюся зь імі судзіцца. Калі добраахвотна не навучыліся любіць Беларусь і яе нацыянальную мову, то будзем яе прывіваць праз скаргі і суды», — камэнтуе адказ Ігар Барысаў.

Акрамя скаргі ў «Магілёўаблаўтатранс» актывіст паскардзіўся і ў аддзел па ідэалягічнай працы Магілёўскага гарвыканкаму. Адказу ад ідэолягаў ён яшчэ не атрымліваў.

Источник: Белорусская социал-демократическая партия (Грамада)

  Обсудить новость на Форуме