10:00 24.07.2014 | Все новости раздела "Белорусская социал-демократическая партия (Грамада)"

Сацыял-дэмакрат Барысаў чакае суду за газэты (дапоўнена)

Магілёўскі раённы аддзел міліцыі вінаваціць актывіста ў тым, што той парушыў закон «Аб сродках масавай інфармацыі», бо распаўсюджваў друкаваныя выданьні, ня маючы на гэта адпаведнага дакумэнту

23 ліпеня на сябра прэзыдыюму Беларускай сацыял-дэмакратычнай партыі «Грамада» Ігара Барысава склалі пратакол. Магілёўскі раённы аддзел міліцыі вінаваціць актывіста ў тым, што той парушыў закон «Аб сродках масавай інфармацыі», бо распаўсюджваў друкаваныя выданьні, ня маючы на гэта адпаведнага дакумэнту.

Адміністрацыйную справу зьбіраюцца перадаваць у суд. Ігару Барысаву пагражае штраф да 50 базавых велічыняў.

Падставай для перасьледу актывіста стаў арышт вялікай партыі газэт, якую міліцыянты знайшлі ў ягонай прыватнай машыне ўначы 16 ліпеня.

Ігар Барысаў кажа, што ў яго забралі партыйны бюлетэнь «Сацыял-дэмакрат», прысьвечаны кампаніі «Народны рэфэрэндум», а таксама наклад газэты «Наш Магілёў», у якой падавалася інфармацыя пра грамадзкую кампанію ў абарону помнікаў архітэктуры абласнога цэнтру.

Аўто з газэтамі спынілі супрацоўнікі ДАІ ў адной з прыгарадных магілёўскіх вёсак. Патлумачылі, што машына Барысава ў вышуку — нібыта на ёй было ўчынена хуліганства. Пабачыўшы ў багажніку пакункі, ДАІшнікі адагналі машыну ў раённы аддзел міліцыі. Там склалі пратакол.

Міліцыянт, прагледзеўшы выданьні, ня ўбачыў у іх нічога крамольнага. Проста яму загадалі скласьці пратакол — ён яго і склаў

Ігар Барысаў лічыць, што арышт газэт зьвязаны з маючымі адбыцца прэзыдэнцкімі выбарамі. На яго думку, улада спрабуе перакрыць каналы паступленьня друкаваных выданьняў, таму і ўзмацніла кантроль за дзейнасьцю актывістаў.

«У міліцыі была арыенціроўка на мяне. Калі супрацоўнікі ДАІ аглядалі машыну, яны гэта рабілі нядбайна. Яны нават не глядзелі, што ў пакунках. Тое ж сёньня было і падчас складаньня пратаколу. Міліцыянт, прагледзеўшы выданьні, ня ўбачыў у іх нічога крамольнага. Проста яму загадалі скласьці пратакол — ён яго і склаў. Хоць нават ня ведаў, як афармляць яго. Рабіў гэта зь неахвотай. Бачна было, што імі нехта кіруе», — даводзіць Ігар Барысаў.

Разам зь ім у машыне быў і намесьнік старшыні партыі БНФ Рыгор Кастусёў. Ігар Барысаў зазначае, што міліцыя пакуль думае, ці ня скласьці пратакол і на фронтаўца.

* * *

Магілёў: намеснік старшыні БСДП Ігар Барысаў абвінавачваецца ў парушэнні “Закона аб СМІ”

Сёння, 23 ліпеня, сацыял-дэмакрат быў выкліканы ў РАУС Магілёўскага раёна, дзе маёр Сяргей Галянтаў склаў на яго пратакол аб адміністрацыйным правапарушэнні.

Ігара Барысава абвінавацілі ў парушэнні арт. 22.9 ч.2 КаАП РБ, у адпаведнасці з якім ён, не з’яўляючыся распаўсюднікам СМІ, у парушэнне арт.17 Закона “Аб СМІ” 16 ліпеня на аўтатрасе Мінск-Магілёў здзяйсняў дастаўку “улётак” “Сацыял-дэмакрат” і “НАШ Магілёў” у агульнай колькасці 11 800 асобнікаў на сваім уласным аўтамабілі, што з’яўляецца, у адпаведнасці з арт.1 Закона “Аб СМІ”, распаўсюдам прадукцыі сродкаў масавай інфармацыі.

- Маёр Галянтаў склаў на мяне пратакол аб адміністрацыйным правапарушэнні. Сказаў, што сёння перадае справу ў суд, які будзе прымаць рашэнне датычна таго, што рабіць з маімі “ўлёткамі”, і якое пакаранне мне будзе вынесена за парушэнне “Закона Аб СМІ”, - кажа Ігар Барысаў.

Намеснік старшыні Беларускай сацыял-дэмакратычнай партыі (Грамады) адзначае, што зусім не згодзен з абвінавачаннем, бо не распаўсюджваў друкаваную прадукцыю, а проста перавозіў яе.

Нагадаем, што ўначы 16 ліпеня аўтамабіль Ігара Барысава быў прыпынены ў прыгарадзе Магілёва супрацоўнікамі ДАІ. Яны паведамілі, што на аўтамабіль сацыял-дэмакрата прыйшла арыенціроўка, нібы на ім было здзейснена хуліганства ў райцэнтры Бялынічы. Інспектары паведамілі, што для разбіральніцтва неабходна праехаць у Магілёўскі РАУС. У РАУСе была дагледжана машына Барысава і канфіскаваны друкаваныя матэрыялы.

Нумар “Сацыял-дэмакрат” быў прысвечаны пытанням “Народнага рэферэндума”, а нумар “НАШага Магілёва” – інфармацыйнай кампаніі “Захаваем стары Магілёў”, якая праходзіць у горадзе.

Трэба адзначыць, што Ігару Барысаву пагражае адміністрацыйны штраф у памеры ад 3 да 7,5 мільёнаў рублёў.

Источник: Белорусская социал-демократическая партия (Грамада)

  Обсудить новость на Форуме