13:00 06.02.2013 | Все новости раздела "Белорусская социал-демократическая партия (Грамада)"

ІРЫНА ВЕШТАРД: ЯРМОШЫНА ЗАКРАНУЛА НЕ ТОЛЬКІ ПЫТАННЕ ПРА СЕЛЬСКІЯ САВЕТЫ ДЭПУТАТАЎ

Старшыня Беларускай сацыял-дэмакратычнай  партыі (Грамады) Ірына Вештард пракаментавала выказванне кіраўнічкі Цэнтрвыбаркама аб магчымым скасаванні сельскіх Саветаў  дэпутатаў.

-- Сапраўды, – сказала старшыня БСДП, – трэба нешта вырашаць з колькасцю дэпутатаў мясцовых Саветаў. Па-першае іх ці не зашмат. Па-другое, і дэпутаты, і Саветы надзелены мізэрнымі паўнамоцтвамі.

Ірына Вештард адзначае, што за апошнія два дзесяцігоддзі адбыліся колькасныя і якасныя змены ў складзе насельніцтва краіны. Сельская мясцовасць становіцца пустыннай. Выключэнні накшталт Столінскага раёна рэдкія. Сярэдні ўзрост сельскага жыхара даволі высокі. Акрамя таго, у вёсках фактычна няма структур палітычных партый і грамадскіх аб’яднанняў. Ад усяго гэтага церпіць якасны склад Саветаў. У некаторых мясцовасцях улады прапануюць балатавацца ў дэпутаты тым, хто ёсць, як кажуць, пад рукой. У такой сітуацыі нельга чакаць добрай працы народных абраннікаў.

Лідзія Ярмошына, – працягвае старшыня БСДП Ірына Вештард, – мусіць, сама таго не ведаючы, закранула куды больш важную праблему. Праблема спароджана змяненнямі ў структуры насельніцтва і датычыць тэрытарыяльнага дзялення краіны. Яно нерацыянальнае. Адміністрацыйны падзел Беларусі патрабуе рэформы. Сельскія раёны становяцца пустымі, а вобласці надта вялікія для эфектыўнага кіравання. Два і тры цяперашнія сельсаветы можна смела аб’ядноўваць у адзін. Гэта было б у нейкай меры вяртаннем да падзелу тэрыторыі на воласці. А дзе воласці, там і паветы або акругі, як было ў БССР да 1938 года. Такія гарады, як Бабруйск, Ліда, Барысаў, Орша, Полацк, Баранавічы, Пінск ці Мазыр маглі б стаць цэнтрамі паветаў або акруг, а драбнейшыя гарады, а таксама гарадскія пасёлкі і вялікія сёлы – цэнтрамі валасцей. Скажам, некалі Слуцкі павет цалкам або часткова ахопліваў тэрыторыю цяперашніх Слуцкага, Салігорскага, Ганцавіцкага, Капыльскага, Клецкага, Ляхавіцкага і Нясвіжскага раёнаў. Мо не трэба адраджаць такую вялікую акругу, але што скарачаць колькасць раёнаў раней ці пазней давядзецца – я больш чым упэўненая, – падкрэсліла Ірына Вештард.

У гэтай сістэме, – кажа лідарка сацыял-дэмакратаў, – сапраўды дастаткова выбіраць дэпутатаў валасных, гарадскіх і, скажам так, павятовых Саветаў. Гэта дазволіць рацыянальна выкарыстоўваць рэсурсы і больш эфектыўна вырашаць праблемы тэрытарыяльных адзінак.  

   Прэс-служба БСДП (Грамады)  

Источник: Белорусская социал-демократическая партия (Грамада)

  Обсудить новость на Форуме