14:01 16.09.2010 | Все новости раздела "Белорусская социал-демократическая партия (Грамада)"

НЯКЛЯЕЎ: Я ПРЫНЯЎ РАШЭННЕ. ПЕРАМАГЧЫ І СТАЦЬ ПРЭЗІДЭНТАМ

Лідар грамадзянскай кампаніі «Гавары праўду» афіцыйна абвясціў пра свой удзел у прэзідэнцкай кампаніі. Гэта адбылося 16 верасня а 8.30 у «Паціа Піцы».

«Я прыняў рашэнне браць удзел у прэзідэнцкай кампаніі. Прыняў рашэнне ўдзельнічаць, каб перамагчы і стаць прэзідэнтам», — пачаў сустрэчу з журналістамі лідар грамадзянскай кампаніі «Гавары праўду». Ён гаварыў па-беларуску, у тым ліку і з расійскімі журналістамі.

Ён агледзеў памяшканне і папрасіў фотаапарат. «Я вас сфатаграфую зараз, а калі стану прэзідэнтам, то тыя з вас, хто мае словы пра перамогу і прэзідэнцтва сустрэў без аптымізму, у мой журналісцкі пул не трапяць», — пажартаваў Някляеў.

Забягаючы наперад, можна супакоіць чытачоў, што кандыдат павіншаваў Беларускую асацыяцыю журналістаў з 15-годдзем і перадаў яе старшыні Жане Літвіной букет кветак. «Каб не было незалежнай прэсы, не было б і нашай кампаніі», — падкрэсліў паэт.

Сустрэча з журналістамі была абстаўленая, як бізнес-сняданак. На сталах прадстаўнікоў прэсы чакаў праект праграмы Някляева на 2011-2015 гг, выкананы ў выглядзе палітычнага меню. Чаму паэт пайшоў у палітыку?

Някляеў працытаваў словы Кастуся Каліноўскага з першага нумара «Мужыцкай праўды». «Што змянілася з тых часоў? Сутнасна — нічога», — канстатаваў паэт і заявіў, што краіну трэба мяняць, мяняць сістэму, выводзіць Беларусь на цывілізаваныя рэйкі. Таму і была створаная кампанія «Гавары праўду». Як гэта зрабіць? «Асноўнай стравай» праграмы Някляева ідзе палітычная і канстытуцыйная рэформа.

Някляеў абяцае пераход да парламенцка-прэзідэнцкай формы кіравання. «Хоць я ад пачатку быў выключна за парламенцкую форму».

Ён прыгадаў словы кіраўніка Расіі Дзмітрыя Мядзведзева пра парламенцкую форму кіравання, якую той акрэсліў, як непрымальную для Расіі. Някляеў падкрэсліў, што ў беларусаў ёсць досвед парламентарызму, ён захаваўся, і яго трэба развіваць.

Лозунгам сваёй кампаніі Някляеў абраў словы «Я прыйшоў, каб вы перамаглі».

Гэтыя словы былі ўключаныя ў новы верш паэта, у якім беларусы — снапы на чужым току, якія хто хоча, той і малоціць. Ён прыйшоў, каб зламаць гэты злы рок. «Бог на небе, праўда на зямлі», — дэкламаваў паэт.

«Мы ўсе кажам, што любім Беларусь. Няма падставаў не верыць, што Лукашэнка ды яго атачэнне яе не любяць. Розніца ў тым, ці баліць у іх сэрца за нашу мову, культуру. Вось у мяне баліць. Неймаверна баліць», — прызнаўся Някляеў.

Новае стагоддзе, па словах паэта, не зняла праблемы выклікаў мове і незалежнасці малых краінаў. Беларусь — не такая ўжо і малая краіна, кажа Някляеў, але тыя выклікі ёсць і ў яе. Каб выжыць духоўна, трэба выжыць фізічна, упэўнены ён. Паэт працытаваў вынікі перапісу і акцэнтаваў увагу на скарачэнні насельніцтва. «Нас стала на паўмільёна менш. Гэта вялікі абласны горад». Ён адзначыў, што лукашэнкаўская Беларусь — не сацыяльная, а сацыялістычная дзяржава. У нас ідзе пераразмеркаванне багаццяў. Трэба мяняць сістэму, скіроўваць краіну на цывілізаваны шлях.

Галоўнай задачай Някляеў бачыць тое, каб зрабіць абсалютна немагчымым вяртанне сённяшняй сістэмы ў будучыні.

Ці можа апазіцыйны кандыдат у адзіночку перамагчы Лукашэнку? Можа, упэўнены Някляеў. У любым выпадку, ён не будзе адзін. Бо на стадыі збору подпісаў стане ясна, хто здольны працягваць кампанію, а хто не. У гэты момант найбольш здольны атрымае падтрымку тых, хто з дыстанцыі сыдзе.

«Добра, што яны сабраліся разам», — кажа паэт пра сустрэчу чатырох імаверных кандыдатаў у Берштах. Ён упэўнены — гэты ды іншыя прыклады сведчаць, што апазіцыя ўсё яшчэ мае шанец аб’яднацца.

Калі маеш унікальны шанец, то мусіш узняцца над уласнымі амбіцыямі. Ён прыгадаў, што некалі і ў літаратуру ўварваўся, як сёння ў палітыку. «Я разумею нашых палітыкаў. Усе яны насамрэч змагаліся ўсе гэтыя гады. А тут прыйшоў нейкі паэт і адразу да іх». Паэт патлумачыў, што крыўды на яго трымаюць за тое, што нібыта ў ягоную кампанію перацякло шмат партыйных актывістаў. «Дзе ж мне браць тых людзей? Я ж іх не ў партыю клічу. Мы адразу заявілі пра сябе, як пра грамадзянскую платформу, далучыцца да якой можа любы ахвочы». Ён дадаў, што ў камандзе ёсць і прадстаўнікі ўлады. «Я не з тых палітыкаў, што з прыходам да ўлады каменя на камні не пакідаюць ад старой адміністрацыі».

Рэцэпт перамогі ад Някляева стары, як свет – прыйшоў, убачыў, перамог.

П яго словах, калі ўлады створаць усе неабходныя ўмовы для свабодных і празрыстых выбараў, ён не выйдзе на плошчу. Калі гэтага не будзе, то плошча з’явіцца сама сабой. Ён перакананы, што Беларусі не пасуе сілавое вырашэнне супрацьстаяння ўладаў і апазіцыі. Пры гэтым паэт прызнаў, што дэклараваны прынцып роўнасці ўсіх кандыдатаў не спрацоўвае ўжо цяпер. Сёння ж павінна адбыцца фармаванне ініцыятыўнай групы. Някляеўцы так і не здолелі адшукаць адпаведнага памяшкання апроч сядзібы БНФ у Мінску.

Паэт прызнаўся, што стаміўся адбівацца ад абвінавачванняў у прарасійскай дзейнасці.

«Я быў і ёсць беларускім паэтам, я беларускі кандыдат і я стану беларускім прэзідэнтам», — адчаканіў Някляеў.

Сустрэчу ён вёў выключна па-беларуску, нават на пытанні расійскіх тэлеканалаў адказваў на беларускай мове. На ёй надрукаваны і праект яго праграмы. «Сёння дзень Салідарнасці. Дык будзем салідарнымі!» — такімі словамі скончыў Някляеў афіцыйную частку сустрэчы.
Сямён Печанко  | 10:16, 16 верасня 2010

    *  *  *

                 Уладзімір Някляеў прыняў рашэнне стаць прэзідэнтам

Лідар кампаніі “Гавары праўду” Уладзімір Някляеў прадставіў свае перадвыбарчыя тэзісы ў выглядзе "палітычнага меню" і заявіў пра свой намер перамагчы ў прэзідэнцкай кампаніі. Прэзентацыя адбылася ў адной з мінскіх піцэрыяў. 

– Я, лідар кампаніі “Гавары праўду” Уладзімір Някляеў, прыняў рашэнне прыняць удзел у прэзідэнцкай кампаніі. Прынята таксама рашэнне ў гэтай кампаніі перамагчы і стаць прэзідэнтам. Мы ўсе кажам, што мы любім Беларусь. У мяне няма падстаў не верыць ураду, не верыць Лукашэнку, што яны насамрэч любяць гэтую зямлю, любяць гэты народ. Але ўсё ж такі, відаць, мы па-рознаму яе любім. І розніца заключаецца ў чым? Я думаю ў адным: ці баліць за тое, што адбываецца з яе мовай, з яе культурай, з яе людзьмі, ці не баліць. Вось і ўся розніца. Дык вось мне баліць, неверагодна баліць.

У абвешчаных тэзісах Уладзіміра Някляева на першым месцы стаіць палітычныя і канстытуцыйная рэформа. Палітык выступае за прэзідэнцка-парламенцкую форму кіравання. Ён таксама звяртае ўвагу на развіццё малога і сярэдняга бізнесу ў справе мадэрнізацыі эканомікі і не абмінае праблемаў захавання беларускай нацыі.

***

Лідар грамадзянскай кампаніі "Гавары праўду" Уладзімір Някляеў у адной з мінскіх кавярняў прэзентуе сваё "палітычнае меню" і абяцае перамагчы на выбарах. 

Кіраўніцтва кампаніі "Гавары праўду" засцерагалася, што прэзентацыя перадвыбарчай кампаніі і ўласна абвяшчэнне Уладзімірам Някляевым намеру ісці ў прэзідэнты могуць быць сарваныя, таму ведалі пра месца збору толькі абраныя журналісты.

Прэзентацыя праграмы, "палітычнага меню",  праходзіць у адной з кавярняў у цэнтры Мінска. Запрошаным раздалі незвычайнае меню, у якім у якасці асноўнай стравы прапаноўваецца палітычная і канстытуцыйная рэформа, на халодную страву - крызіс і яго пераадоленне, а ў якасці гарачай закускі - эканамічныя рэформы. На дэсерт - сацыяльны пірог.

Сам палітык і паэт адразу зазначыў, што вырашыў на гэтых выбарах перамагчы і сфатаграфаваў прысутных журналістаў з абяцаннем, што ўсе яны ўвойдуць у будучыні ў прэзідэнцкі клуб. Адказваючы на пытанне, чаму ён, паэт, пайшоў у палітыку, Уладзімір Някляеў зазначыў, што ў яго ёсць жаданне змяніць сітуацыю ў Беларусі да лепшага і ён ведае, як гэта зрабіць. Сведчаннем таму - яго "палітычнае меню", фактычна, гэта і ёсць перадвыбарчая праграма, падпісаная лозунгам "Я прыйшоў, каб Вы перамаглі".  
Сяргей Будкін,.  

    *  *  *

Я ПРЫЙШОЎ, КАБ ВЫ ПЕРАМАГЛІ!

Мы ляжым снапамі на таках
Нас малоціць кожны, хто ў руках
Мае цэп! І так ва ўсе вякі…
І яшчэ пытаюць землякі:
што табе паэту да палітыкі?

Як пытанне – так адказ наўпрост:
Я прыйшоў, каб вы ўдыхнулі волі,
Каб без страху ўсталі ў поўны рост
І на ток не леглі ўжо ніколі!

Каб у родным краі валадарылі
Бог на небе, праўда на зямлі,
Каб збылося ўсё, пра што вы марылі!..

Я прыйшоў, каб вы перамаглі!

Источник: Белорусская социал-демократическая партия (Грамада)

  Обсудить новость на Форуме