11:15 16.07.2013 | Все новости раздела "Белорусская социал-демократическая партия (Грамада)"
МАГІЛЁЎСКІЯ САЦЫЯЛ-ДЭМАКРАТЫ ДАКАЗВАЮЦЬ У СУДЗЕ, ШТО ЯНЫ НЯ «БАНДА»
Судзьдзя Ленінскага суду Магілёва Андрэй Юрчанка пакінуў бяз руху касацыйныя скаргі ў абласны суд Беларускай сацыял-дэмакратычнай партыі «Грамада» і сябра партыі Мікалая Залознага.
У абласным судзе партыйцы жадалі абскардзіць рашэньне гэтага судзьдзі, які не задаволіў іхнага пазову аб абароне гонару, годнасьці і дзелавой рэпутацыі.
Як вынікае з адказу за подпісам судзьдзі Андрэя Юрчанкі, скаргу партыйцаў не дапусьцілі ў абласны суд таму, што прамінуў час, адведзены на яе падачу ў вышэйшую судовую інстанцыю. Апазыцыйнай партыі і яе сябру прапанавалі зьвярнуцца з заявай, пазначыўшы прычыны, чаму так сталася, у Ленінскі суд, каб той разглядзеў магчымасьць аднавіць пратэрмінаваны працэсуальны час.
Партыйцы зьвярнуся ў Ленінскі суд з такой заявай. У ёй яны вінавацяць судзьдзю, што той зацягнуў выдачу рашэньня з матывіровачнай часткай. Акрамя таго, апазыцыянэры ставяць яму ў віну, што ён парушыў артыкул Грамадзянска-працэсуальнага кодэксу, які вызначае, што дзесяцідзённы тэрмін на падачу касацыйнай скаргі пачынаецца ад моманту выдачы рашэньня з матывацыйнай часткай, а не ад моманту агучваньня выраку.
Падставай для судовага разбору сталася выказваньне начальніка жыльлёва-эксплюатацыйнага прадпрыемства «Магілёўаблсельбуд» Паўла Шышова пра Беларускую сацыял-дэмакратычную партыю «Грамада». Адказваючы на пытаньне карэспандэнта інфармацыйнага агенцтва БелаПАН Алеся Асіпцова — чаму высяляюць Мікалая Залознага з інтэрнату? — спадар Шышоў заявіў, што той «состоит в этой банде „Грамада“». Гэтае выказваньне кіраўніцтва БСДП «Грамада» і сам Залозны палічылі зробленым наўмысна, каб зьняважыць дзелавую рэпутацыю Беларускай сацыял-дэмакратычнай партыі «Грамада».
Судзьдзя Андрэй Юрчанка не задаволіў пазову апазыцыйнай партыйнай арганізацыі.
Сябра прэзыдыюму апазыцыйнай партыі Ігар Барысаў цьвердзіць, што судзьдзя цяпер наўмысна не дае ходу касацыйнай скарзе ў абласны суд, бо справа, якую ён разглядаў, матываваная палітычна:
«На судзе з прадстаўленых доказаў было відавочна, што менавіта Шышоў назваў нашу партыю „бандай“. Але судзьдзя нібы аглух і асьлеп. Ён не хацеў прызнаваць відавочнага. Нават прызнаць чыноўніка ня дужа высокага рангу вінаватым і пастанавіць, каб ён выбачыўся, цяперашняя сыстэма папросту не дапускае. Яна становіцца ў глухую абарону і нібыта кажа, што мы нікога са сваіх не караем».
Павал Шышоў, адстаўны палкоўнік міліцыі, заявіў у судзе, што голас на стужцы журналіста змантаваны і што ён такога не гаварыў. Судзьдзя Юрчанка адмовіў пазоўнікам у хадайніцтве аб тым, каб накіраваць аўдыёзапіс сюжэта з голасам Шышова з сайту БелаПАН і рабочы матэрыял Асіпцова на фонаскапічную экспэртызу. Не задаволеным засталося і хадайніцтва партыйцаў аб адводзе судзі з прычыны недаверу яму.
Обсудить новость на Форуме