22:00 26.05.2015 | Все новости раздела "Белорусская социал-демократическая партия (Грамада)"

Мікашэвічы: Віталя Каліноўскага будуць судзіць за салідарнасьць з Юр’ем Рубцовым

Мікашэвіцкі грамадзкі актывіст Віталь Каліноўскі 26 траўня быў затрыманы міліцыянтамі за расклейваньне ўлётак з партрэтамі палітвязьняў.

Яго даставілі ў гарадзкі адзьдзел міліцыі, дзе апыталі і склалі пратакол «за парушэньне добраўпарадкаваньня населеных пунктаў» (арт. 21.14 ч.2 Адміністратыўнага кодэксу Беларусі).

Віталь Каліноўскі распавёў карэспандэнту Свабоды, што затрыманьне адбылося а 15.20, калі ён ужо скончыў расклейваць улёткі:

«Расклеваў на прыпынках, ды стэндах плякаты з партрэтамі палітвязьняў. Справа ў тым, што людзі ня ведаюць пра іх, бо чытаюць афіцыйныя СМІ. Я хацеў прыцягнуць увагу да тэмы палітвязьняў, каб людзі ведалі, што ў турмах сядзяць тыя, хто змагаецца за іх правы. Заўтра ў Пружанах будзе адбывацца судзілішча над палітвязьнем Юр’ем Рубцовым, і я хацеў такім чынам выказаць салідарнасьць зь ім».

Паводле Каліноўскага, у пастарунку міліцыянты цікавіліся, чаму ён вырашыў зладзіць гэтую акцыю, ці былі ў яго саўдзельнікі, дзе ўзяў улёткі і г.д. Актывіст распавёў ім, што скарыстаўся сваім канстытуцыйным правам на распаўсюд інфармацыі.

Міліцыянты паведамілі Віталю Каліноўскаму, што прыблізна праз два тыдні яго выклічуць на суд.

Паводле адміністратыўнага артыкулу, яму пагражае ад 5 да 25 базавых велічыняў штрафу (900 тысяч — 4,5 мільёны рублёў). ПД

Паводле Радыё Свабода

P.S. Віталь Каліноўскі - сябра ЦК БСДП (-bsdpps)

Источник: Белорусская социал-демократическая партия (Грамада)

  Обсудить новость на Форуме