01:47 25.06.2013 | Все новости раздела "Белорусская социал-демократическая партия (Грамада)"
Лінкявічус: Макея пусьцілі ў ЭЗ, каб дапамагчы палітвязьням
Міністар замежных справаў Літвы Лінас Лінкявічус сказаў нашаму радыё, што ён чакае свайго беларускага калегу Ўладзімера Макея ў Брусэлі ў ліпені, каб абмеркаваць пытаньне палітвязьняў у Беларусі.
Размову з прадстаўніком Літвы, якая пачынае паўгадовае старшынёўства ў Эўразьвязе ў ліпені, правёў наш брусэльскі карэспандэнт Рыкард Юзьвяк.РС: Чаму вы вырашылі зьняць візавыя абмежаваньні з Уладзімера Макея?
Лінкявічус: Вырашана так, каб устанавіць канал сувязі, таму што нам трэба падтрымліваць сувязь, нам трэба размаўляць — ня толькі слухаць, але і перадаваць паведамленьні наўпрост. Гэта асноўная прычына. У ліпені ў нас будзе сустрэча, на якой мы будзем мець больш інфармацыі і абмяркуем далейшыя крокі. Мы лічым, што мы павінны ўзаемадзейнічаць зь Беларусьсю, каб схіліць яе да нейкіх зьменаў у стаўленьні, асабліва ў адносінах да палітвязьняў. Дзеля гэтага трэба выкарыстаць усе сродкі і ўсе каналы.
РС: Ці вы чакаеце Макея ў Брусэлі ў ліпені?
Лінкявічус: Я чакаю. Зразумела, рашэньне будуць прымаць у Менску, але я чакаю, што сёньняшняе наша рашэньне будзе імі ўспрынятае станоўча.
РС: Ці вы думаеце, што ў дачыненьні да іншых асобаў у гэтым сьпісе таксама варта зьняць візавыя абмежаваньні?
Лінкявічус: З гэтым трэба асьцярожна, бо такія крокі можна абмяркоўваць і разважаць толькі пасьля таго, як наступяць нейкія зьмены ў Беларусі. На жаль, пакуль што сытуацыя няшмат зьмянілася. Сваім сёньняшнім рашэньнем мы нікога не ўзнагароджваем, мы толькі ўсталёўваем канал сувязі дзеля ўзаемадзеяньня, каб заахвоціць нейкія зьмены.
РС: Калі гаварыць пра саміт ЭЗ і краінаў Усходняга партнэрства ў Вільні, то хто будзе прадстаўляць Беларусь — Макей?
Лінкявічус: Я змагу адказаць на гэтае пытаньне толькі пасьля сустрэчы міністраў замежных справаў ЭЗ у ліпені.
Обсудить новость на Форуме