22:46 28.03.2011 | Все новости раздела "Белорусская социал-демократическая партия (Грамада)"

КАНФЕРЭНЦЫЯ Ў ПОЛАЦКУ (ФОТА)

Перад угодкамі абвяшчэння незалежнасці Беларускай Народнай Рэспублікі ў Полацку адбылася канферэнцыя сяброў БСДП Віцебскай вобласці. Удзельнікі канферэнцыі адзначылі таксама і 20-годдзе адраджэння і дзейнасці сацыял-дэмакратыі ў Беларусі.

З рэфератам пра абставіны абвяшчэння Беларускай Народнай Рэспублікі і яе незалежнасці, аб ролі Беларускай Сацыялістычнай Грамады ў падзеях лютага– сакавіка 1918 г. выступіў Анатоль Сідарэвіч.

Паведамленні аб працы сацыял-дэмакратаў зрабілі намеснік старшыні Віцебскай абласной арганізацыі і старшыня Верхнядзвінскай раённай арганізацыі БСДП Валянціна Болбат, сябар абласнога камітэта партыі, лідэр сацыял-дэмакратаў г. Полацка Альберт Маркаў і рэвізор абласной арганізацыі, кіраўнік сацыял-дэмакратаў г. Наваполацка Антон Ясіновіч.

Удзельнікі канферэнцыі прынялі зварот да грамадзян Беларусі.

Зварот

сяброў БСДП Віцебскай вобласці – удзельнікаў святочнай канферэнцыі, прысвечанай угодкам незалежнасці БНР і 20-годдзю адраджэння і дзейнасці сацыял-дэмакратыі ў Беларусі

Сябры Беларускай сацыял-дэмакратычнай партыі (Грамады) Віцебскай вобласці звяртаюцца да грамадзян Рэспублікі Беларусь, сяброў грамадскіх арганізацый, прафсаюзаў,палітычных партый і рухаў.

У краіне працягваецца і паглыбляецца палітычны і сацыяльна-эканамічны крызіс. Зніжаецца жыццёвы ўзровень, расце безпрацоў’е, скарачаюцца працоўныя месцы як у прыватным, так і ў дзяржаўным сектарах эканомікі, “замарожваюцца” пенсіі, зарплаты, сацыяльныя дапамогі. З другога боку, у разы падвышаюцца кошты спажывецкіх і прамысловых тавараў, тарыфы на паслугі жылёва-камунальнай гаспадаркі, сувязь, транспарт. Валавы знешні доўг Беларусі складае 28 млрд.512 млн. долараў ЗША, або 52,2% унутранага валавага прадукта краіны, што цяжкім грузам кладзецца на плечы грамадзян Беларусі. На 1 студзеня 2011 года доўг складае 3 тыс. долараў ЗША на кожнага жыхара Беларусі.

Падзеі, асабліва апошняга часу паказваюць, што дзеючая улада не выведзе краіну з “багны”, у якой мы знаходзімся. Дзеянні ўлады прывялі да абвастрэння палітычнага і сацыяльна-эканамічнага крызісу, які мы перажываем.

Мы, сябры БСДП Віцебскай вобласці, заклікаем грамадзян Беларусі яднацца ў шэрагах барацьбітоў за грамадзянскія, палітычныя, сацыяльна-эканамічныя правы і свабоды, разам з палітычнымі партыямі, прафсаюзамі змагацца за права, звацца людзьмі, а не быць закладнікамі ў руках улады.

Мы за ДЭМАКРАТЫЮ, СВАБОДУ, РОЎНАСЦЬ,САЛІДАРНАСЦЬ!

ЖЫВЕ БЕЛАРУСЬ!

Витебск-конф 600