10:01 29.10.2010 | Все новости раздела "Белорусская социал-демократическая партия (Грамада)"
Ці верыце Вы ў гэта?
Аляксандр ЛУКАШЭНКА:
"Беларусь рыхтуецца да важнейшай унутрыпалітычнай падзеі, — выбараў кіраўніка дзяржавы. Як дзеючы прэзідэнт хачу запэўніць, што зраблю ўсё ад мяне залежнае, каб яны прайшлі ў строгай адпаведнасці з нацыянальным заканадаўствам і сусветнымі стандартамі".
Ці верыце Вы ў гэта?
Алесь БЯЛЯЦКІ, кіраўнік зліквідаванага ўладамі праваабарончага цэнтра "Вясна":
— Не, не веру. Таму што ён ужо не аднойчы маніў на гэты конт. Ён збіраўся правесці чэсныя, справядлівыя выбары ў 2006 годзе, парламенцкія — у 2008-м, але, як паказала практыка, нягледзячы на запэўніванні, выбары праходзілі з парушэннямі і фальсіфікацыямі.
Як будзе на гэты раз — пакажа час, пакуль мы назіраем. Хацелася б памыліцца, але падаецца, што калі і насамрэч у Беларусі пройдуць свабодныя, чэсныя і справядлівыя выбары, то гэта будзе насуперак спадзяванням некаторых зацікаўленых асоб.
Аляксандр ФЯДУТА, палітолаг:
— Нацыянальнае заканадаўства — так, сусветныя стандарты — не.
Анатоль СІДАРЭВІЧ, старшыня Беларускай сацыял-дэмакратычнай партыі (Грамада):
— Па-першае, хочацца заўважыць, што не ад прэзідэнта краіны павінна залежыць, па якіх стандартах будуць праходзіць выбары. Прэзідэнт у гэтым працэсе павінен быць фігурай нейтральнай. Такой заявы не дазволіў бы сабе ні Клінтан, ні Сарказі. Падобная заява Лукашэнкі сведчыць толькі пра тое, што насамрэч у Беларусі няма выбараў.
Ці веру я ў тое, што Лукашэнка зробіць усё ад яго залежнае ў сэнсе правядзення дэмакратычных выбараў? Як пісаў расійскі класік: "Свежо предание, да верится с трудом…"
Зінаіда БАНДАРЭНКА, народная артыстка Беларусі:
— Не, не веру. Бо словы ў дадзеным выпадку разыходзяцца са справай. Насамрэч ціск адчуваюць многія людзі, якія асмеліліся пайсці на гэтыя выбары, апаніруючы дзеючаму кіраўніку. З іншага боку, а што ён павінен гаварыць? Словы Аляксандра Рыгоравіча аб тым, што ён згодны правесці выбары ў адпаведнасці з сусветнымі стандартамі, у першую чаргу разлічаны на заходнікаў. Але я не веру, што гэтыя выбары будуць адрознівацца па характары ад выбараў 2006 года.
Анатоль ПАЎЛАЎ, кіраўнік Мінскай гарадской арганізацыі Аб'яднанай грамадзянскай партыі, сябра кампаніі "За справядлівыя выбары":
— Не, не веру. Па-першае, таму што папярэдняя гісторыя правядзення выбараў у Беларусі сведчыць пра тое, што выбары не адпавядалі сусветным стандартам. Па-другое, вынікі фарміравання тэрытарыяльных выбарчых камісій гавораць пра тое, што прэзідэнцкія выбары ў нас не будуць свабоднымі. А па-трэцяе, калі ў склад кожнай з участковых выбарчых камісій не будзе ўключана хаця б па адным прадстаўніку ад апазіцыі, то ні пра якія сусветныя стандарты і гаварыць не варта... І апошняе: пра якія сусветныя стандарты можна гаварыць, калі выступленні кандыдатаў і дэбаты паміж імі будуць трансліравацца ў запісе.
Віталь ГАРБУЗАЎ
Обсудить новость на Форуме