21:31 01.02.2010 | Все новости раздела "Белорусская социал-демократическая партия (Грамада)"

ЦІ ЗДОЛЬНА ВАША ПАРТЫЯ (РУХ) ПРАВЕСЦІ ХОЦЬ АДНАГО СВАЙГО КАНДЫДАТА Ў МІНСКІ ГАРАДСКІ САВЕТ НАРОДНЫХ ДЭПУТАТАЎ?

Анатоль ЛЯБЕДЗЬКА, старшыня Аб’яднанай грамадзянскай партыі:

— Калі б выбары ў Беларусі былі сапраўды выбарамі, то прадстаўнікі АГП проста занялі б палову дэпутацкіх месцаў у Мінскім гарадскім савеце дэпутатаў. Але, улічваючы тое, як выбары праводзяцца ў нас насамрэч, калі падчас працы выбарчых камісій іх сябры праяўляюць майстэрства, вартае шулераў і напарстачнікаў, то ні адна страхавая кампанія ў свеце не возьмецца гарантаваць вам тое, што хоць адзін дэмакратычны кандыдат выйграе выбары.

— А што, у вашай партыі недастаткова сіл, каб узяць пад шчыльны кантроль хаця б адзін з участкаў, дзе будзе балатавацца ваш кандыдат?

— Асаблівага сэнсу ў тым, каб расстаўляць “кантралёраў”, няма, бо цалкам верагодны той факт, што нашы з вамі галасы ніхто не будзе лічыць — патрэбныя ўладзе лічбы загадзя ўнясуць у пратаколы. Падлік галасоў стане сапраўды празрыстым, калі ў складзе кожнай з камісій будзе хоць некалькі чалавек, якія не залежаць ад гэтай улады... Верагоднасць гэтага, вы самі разумееце, мізэрная...

Анатоль ЛЯЎКОВІЧ, старшыня Беларускай сацыял-дэмакратычнай партыі (Грамада):

— Добрае пытанне... У прынцыпе, я лічу, што наша партыя на гэта здольная. Іншая праблема ў тым, што і самі партыйцы, і выбаршчыкі расчараваны — выбараў у нас няма. Празрыстыя і справядлівыя выбары ў суверэннай Беларусі, на вялікі жаль, не сталі традыцыяй. У нас спрацоўвае правіла: не важна, як галасуюць, а важна, як лічаць галасы і якія канчатковыя лічбы ўносяцца ў пратакол...

— А не думалі над тым, каб узяць пад пільны кантроль хаця б тыя ўчасткі, дзе будуць балатавацца найбольш моцныя кандыдаты ад партыі? Ці хопіць у вашай партыі на гэта людзей?

— Хоць у нашай партыі не так шмат людскога рэсурсу, але мы здольныя арганізаваць кантроль за галасаваннем у той акрузе, па якой будзе вылучацца наш кандыдат... Праўда, яшчэ раз паўтаруся, нават пры такім падыходзе няма ўпэўненасці ў справядлівым падліку галасоў...

Мікалай СТАТКЕВІЧ, старшыня аргкамітэта па стварэнні Сацыял-дэмакратычнай партыі (Народная Грамада):

— Дзіўнае пытанне... Бо праблема палягае не ў тым, як, скажам, кандыдатам ад нашай партыі заваяваць галасы выбаршчыкаў. Праблема якраз-такі ў тым, што, магчыма, гэтыя галасы ніхто не будзе лічыць... Але... Асаблівасць мясцовых выбараў такая, што з-за невялікай колькасці і адносна малой тэрыторыі выбарчых акруг сістэма фальсіфікацый, адладжаная ўладай, дае збоі... Сведчанне гэтаму тое, што пяцёра нашых партыйцаў былі абраныя ў мясцовыя саветы падчас мінулых выбараў.

Адсочваць ход галасавання на тых акругах, дзе будуць балатавацца нашы кандыдаты, мы будзем. Іншая справа, што калі пачынаецца падлік галасоў, назіральнікаў звычайна просяць адысці далей ад стала, на якім падлічваюць бюлетэні.

Cяргей КАЛЯКІН, старшыня партыі “Справядлівы свет”:

 — Безумоўна, мы на гэта здольныя, калі выбары сапраўды будуць выбарамі...

Віктар КАРНЯЕНКА, намеснік старшыні руху “За Свабоду”:

— Так, рух “За Свабоду” на гэта здольны. Для гэтага ў нас ёсць як чалавечы рэсурс, так і адпаведны досвед. Праўда, калі сітуацыя з выбарамі не зменіцца, то гарантаваць тое, што ў дэпутаты пройдуць прадстаўнікі апазіцыі, можа толькі недасведчаны чалавек.

— І ўсё ж такі акругі на мясцовых выбарах значна меншыя, чым на парламенцкіх альбо прэзідэнцкіх. Ці “закрыеце” вы назіральнікамі хаця б тыя, дзе будуць самыя вялікія шанцы на перамогу вашых кандыдатаў?

— Каб выбары прайшлі сумленна, аднаго назірання мала. Для гэтага патрэбна палітычная воля ўлады. А механізмы для справядлівага правядзення выбараў ёсць — гэта можа быць і ўключэнне ў камісіі апанентаў улады, і сумленны падлік галасоў...

Юрась БЕЛЕНЬКІ, намеснік старшыні КХП-БНФ:

— У нас няма ні выбараў, ні Мінскага гарадскога савета дэпутатаў. Я, як чалавек, які ў свой час быў і дэпутатам Мінскага гарадскога савета, і дэпутатаў Вярхоўнага Савета, з усёй адказнасцю скажу, што Мінскі савет дэпутатаў зараз не з’яўляецца прадстаўнічым выбарчым органам. Дэпутатаў сюды не выбіраюць, а прызначаюць. Таму слова “правесці” ў пытанні падаецца некарэктным. Таму што чалавека можна правесці ў дэпутаты, калі ёсць магчымасць для адкрытага спаборніцтва. Такой магчымасці няма.

Наша партыя паслядоўна заклікае грамадзян да няўдзелу ў выбарах. Таму што тыя, хто ўдзельнічае ў гэтай фальшыўцы, гуляюць па правілах улады, удзельнічаючы ва ўладным праекце...

Павел СЕВЯРЫНЕЦ, адзін з сустаршыняў аргкамітэта па стварэнні партыі “Беларуская хрысціянская дэмакратыя”

— Беларускія хрысціянскія дэмакраты, безумоўна, на гэта здольны. У Мінску будуць вылучаны 15 кандыдатаў.

— Ці хопіць у вас сіл, людскога рэсурсу, каб не даць уладам магчымасці сфальсіфікаваць вынікі галасавання?

— Зразумела, што на чарговых мясцовых выбарах магчымы фальсіфікацыі. Аднак толькі ў Мінску каля 500 сяброў БХД. Сіл на тое, каб не дапусціць фальсіфікацый, у нас хопіць. Таму пад пільную ўвагу, пад узмоцненае назіранне будуць узяты тыя акругі і ўчасткі, дзе будуць балатавацца актывісты БХД.

Ігар ЛЯЛЬКОЎ, намеснік старшыні Партыі БНФ:

— Па сваім патэнцыяле, па здольнасцях партыйцаў, безумоўна, наша партыя на гэта здольная. Але ўсё будзе залежаць ад таго, наколькі справядлівым будзе падлік галасоў. Безумоўна, мы будзем прапаноўваць сваіх людзей і ў якасці назіральнікаў, і ў якасці сяброў участковых камісій. Праўда, канкрэтную колькасць гэтых людзей я пакуль назваць не гатовы...

Станіслаў ШУШКЕВІЧ, старшыня Беларускай сацыял- дэмакратычнай грамады:

— Цікавае пытанне... Шчыра кажучы, у партыйцаў няма жадання прымаць удзел у гульні пад назвай “выбары”. Рашэнне аб удзеле ў мясцовых выбарах мы будзем прымаць пасля фарміравання выбарчых камісій. Калі змены ў гэтым накірунку адбудуцца, калі ў камісіі дапусцяць прадстаўнікоў апазіцыі, можна будзе ўдзельнічаць. А так... Навошта марнаваць час, калі ў дэпутаты трапяць тыя, каго прызначаць?

Віталь ГАРБУЗАЎ

Источник: Белорусская социал-демократическая партия (Грамада)

  Обсудить новость на Форуме

Белоруссия

Белорусская социал-демократическая партия (Грамада) Объединенная Гражданская Партия Россия Украина Белоруссия Молдавия Казахстан Киргизия Узбекистан