22:45 25.07.2014 | Все новости раздела "Белорусская социал-демократическая партия (Грамада)"

Брэсцкія сацыял-дэмакраты пратэстуюць супраць "узаконенага браканьерства"

Менавіта так актывісты характарызуюць перадачу ў арэнду 10 кіламетраў ракі для прамысловай лоўлі рыбы.

Частку ракі Мухавец Брэсцкі райвыканкам здаў у арэнду на 5 год прадпрыемству "Белэлектрабудмантаж". Арандаваны ўчастак пачынаецца ад Чырвонага Двара да мяжы з Жабінкаўскім раёнам.

Па словах кіраўніка абласной арганізацыі БСДП(Грамада) Ігара Маслоўскага, дадзены ўчастак ракі ўнікальны разнастайнасцю іхтыяфаўны: тут водзяцца еўрапейскі сом, судак, лешч і іншыя віды рыб. На думку актывіста, з-за прамысловай лоўлі дадзеныя віды рыб могуць знікнуць, а тэхналогій па іх штучным вырошчванні ў Беларусі практычна няма.

"Якое можа быць вядзенне рыбалоўнай гаспадаркі, калі гэта будзе просты адлоў рыбы з выкарыстаннем сетак, з выкарыстаннем неваду, з выкарыстаннем жакаў. Немагчыма ў такіх умовах правесці праверку, ці гэтая арганізацыя займалася зарыбленнем рыбы".

Брэсцкія сацыял-дэмакраты абвясцілі доўгатэрміновую кампанію па вяртанні ўчастку ракі ў агульнадаступнае карыстанне. Паводле Канстытуцыі РБ, натуральныя прыродныя аб'екты з'яўляюцца ўласнасцю дзяржавы, таму яны не могуць быць прадметам арэнды. Актывісты патрабуюць, каб участак ракі вярнуўся сапраўдным гаспадарам — народу Беларусі. Працягвае Ігар Маслоўскі:

"Натуральны прыродны аб'ект — рака — не можа быць прадметам арэнды любога прадпрыемства, любой уласнасці. Тым больш што гэтае прадпрыемства не профільнае, а павінна займацца тым, што прапісана ў самой назве: гэта — электрычнасць, будаўніцтва, нейкі мантаж. Гэта таварыства з абмежаванай адказнасцю, таму нават з назвы вынікае, што адказнасць абмежаваная".

У межах кампаніі актывісты плануюць правесці збор подпісаў сярод мясцовых жыхароў. Таксама яны накіруюць звароты ў кантрольныя і праваахоўныя органы, каб была праведзена праверка законнасці дзеянняў улады.

Фота: virtual.brest.by

Источник: Белорусская социал-демократическая партия (Грамада)

  Обсудить новость на Форуме