20:30 11.10.2015 | Все новости раздела "Белорусская социал-демократическая партия (Грамада)"
Берасьце: «Калі б не было Караткевіч, галасавалі б за Лукашэнку»
Берасьце: «Калі б не было Караткевіч, галасавалі б за Лукашэнку»
Канцэрт у буфэце ўчастку № 18 Берасьця
У Берасьці, як і ў іншых мясьцінах, галасаваньне суправаджаецца канцэртамі ды таннымі буфэтамі. Назіральнікі фіксуюць парушэньні, некаторыя выбарцы кажуць, што «калі б не было Караткевіч, то галасавалі б за Лукашэнку».
У Берасьці, як і па ўсёй Беларусі, адметнасьцю выбараў сталі танныя буфэты ды канцэрты мастацкай самадзейнасьці. Вялікіх натоўпаў на ўчастках няма. Назіральнікі кажуць — гэта з-за таго, што шмат людзей прагаласавалі датэрмінова.
Карэспандэнт Свабоды прайшоў па некалькіх участках у цэнтры Берасьця.
Спадар: «Я галасаваў за Караткевіч...»
Спадарыня: «Я таксама за Караткевіч. Таму што мы хочам, каб нешта мянялася. Яна маладая, пэрспэктыўная. Павінна быць новае паветра, новы віток, нешта новае ў гэтым жыцьці павінна быць. Мы думаем, што шанцаў у яе няма, але мы хадзілі, каб пры падліку, пры аналізе, бачылі, што людзі хочуць пераменаў».
Спадар: «Калі б не было Караткевіч, я б таксама за Лукашэнку прагаласаваў. А тое, што ва Ўкраіне... гэта, канечне, спрацавала на руку нашаму прэзыдэнту...»
Як распавёў берасьцейскі кіраўнік кампаніі назіраньня «Права выбару» Ігар Маслоўскі, «улада не вытрымлівае трох крытэраў», каб выбары адпавядалі дэмакратычным стандартам:
Ігар Маслоўскі
«Па-першае — гэта масавае неўключэньне прадстаўнікоў палітычных партыяў ва ўчастковыя выбарчыя камісіі. Па-другое — гэта велізарны працэнт датэрміновага галасаваньня. І трэцяе — скрыні для датэрміновага галасаваньня захоўваюцца неналежным чынам».
Алькаголь ды ежу ў школьнай сталоўцы прадаюць гандляркі ў нацыянальных строях
Спадар Маслоўскі распавёў, што ўлады выкарыстоўваюць новы мэтад ціску на назіральнікаў — калі праўладныя назіральнікі скардзяцца ў камісію, што незалежныя назіральнікі перашкаджаюць гэтай самай камісіі працаваць.
Менавіта на такой падставе ў часе датэрміновага назіраньня быў пазбаўлены акрэдытацыі Ўладзімер Вялічкін, які працаваў як незалежны назіральнік ад жыхароў свайго дому.
У буфэтах — танныя прадукты
Берасьцейскі кіраўнік назіральнікаў ад кампаніі «За справядлівыя выбары» Леанід Майструк распавёў, што фіксуюцца ледзь не адкрытыя ўкіды бюлетэняў у скрыні:
Леанід Майструк
«Па папярэднім галасаваньні ў нас сур’ёзныя нараканьні ўзьніклі ў Баранавічах, дзе назіральнік, які прысутнічаў цэлы дзень, практычна ўбачыў яўнае парушэньне, зьвязанае з укідам бюлетэняў. Была зроблена афіцыйная заява ў пракуратуру. Былі таксама прадстаўнікі місіі АБСЭ, якія выехалі на месца».
Назіральнікі прагназуюць, што выбары будзе цяжка прызнаць дэмакратычнымі.
Паводле афіцыйнай інфармацыі, на 14 гадзіну 11 кастрычніка ў Берасьцейскай вобласьці прагаласавала 65% выбарцаў. Датэрмінова ў рэгіёне прыйшлі на ўчасткі 37,5% выбарцаў.
Обсудить новость на Форуме